Germaniya qurolli kuchlari general-leytenanti Aleksander Zollfrank Rossiya NATO hududiga cheklangan zarba berish uchun yetarlicha kuchga ega ekanini taʼkidladi. Bu haqida BILD nashri xabar berdi.

“Biz Rossiyaning nimaga ega ekani va u bilan nima qila olishini baholashimiz shart. Shunga asoslanib aytishimiz mumkinki, Rossiya NATO hududiga cheklangan miqyosda hujum qilishi mumkin”, — deydi Zollfrank.

Uning qoʻshimcha qilishicha, Rossiya qurol-yarogʻ toʻplashda davom etsa, 2029-yilga kelib NATOga keng koʻlamli hujum haqiqatga aylanishi mumkin. Zollfrank hamma narsa Gʻarbning xatti-harakatlariga va ittifoqning kuch ishlatish qobiliyatiga bogʻliqligini aytgan.

Generalning bildirishicha, Moskva allaqachon NATO mamlakatlariga qarshi kiberhujumlar, sabotaj va dezinformatsiyadan foydalanib, gibrid urush olib bormoqda.

“Bu usul noaniqlik keltirib chiqarish, qoʻrquv yaratish, zarar yetkazish va josuslarni joylashtirishga qaratilgan. Bu qoʻrquvga asoslangan urush”, — deb qoʻshimcha qilgan Zollfrank.

Bundesver maʼlumotlariga koʻra, Rossiya Ukrainadagi yoʻqotishlariga qaramay qurolli kuchlarining jangovar tayyorgarligini saqlab qolmoqda. Bu esa NATOga cheklangan hujum operatsiyalarini amalga oshirish imkonini beradi.