“Ezgulik” jamiyati raisi Abdurahmon Tashanov Mirobod tuman sudi oʻzbekistonlik fuqaroni Rossiyada boʻlib turgan davrida Toshkentda IIO xodimlarining qonuniy talabiga boʻysunmaslikda ayblab, 15 sutkaga qamash haqida qaror chiqarganini maʼlum qildi.

Tashanov sud qarori va fuqaro pasportiga viza muhri urilgani aks etgan suratlarni ham ilova qilib, hujjatlarda koʻrsatilgan sanalar ham bir-biriga nomutanosib ekanini takidlagan. Unga koʻra, aybdor deb topilgan fuqaro 20-martdan 25-aprelgacha oilasi bilan Rossiyada boʻlgan. Sud hujjatida esa huquqbuzarlik 16-aprelda sodir etilgani koʻrsatilgan.

Sudyalar oliy kengashi mazkur xabar yuzasidan quyidagicha izoh berdi.

“Joriy yilning 17-may kuni jinoyat ishlari boʻyicha Mirobod tuman sudida U.R.ga doir maʼmuriy huquqbuzarlikka oid ish koʻrib chiqilib, tegishli jazo tayinlangan. Sud qarorida huquqbuzarlik sodir etilgan sana 16-aprel deya qayd etilgan boʻlsa-da, mazkur holat texnik xatolik boʻlib, sudya tomonidan oʻsha vaqtning oʻzida qoʻshimcha qaror chiqarish yoʻli bilan bartaraf etilgan”, deyiladi xabarda.

Aniqlik kiritilishicha, shu yilning 16-may kuni sodir etilgan ushbu maʼmuriy huquqbuzarlikka doir ish materiallari 17-may kuni sudga kelib tushgan boʻlib, elektron taqsimotga koʻra, sudya S. Xoʻjamqulova ish yurituviga olingan. Mazkur jarayon toʻliq raqamlashtirilgan boʻlib, ushbu dasturga inson omilining taʼsiri yoʻq.

“Alohida taʼkidlash shartki, ushbu bayonot sud qarori qonuniyligi yuzasidan  Kengash xulosasi sifatida talqin qilinmasligi kerak. Chunki, qonunga koʻra, sud qarorlariga huquqiy baho berish yuqori sud instansiyasi vakolatiga taalluqli”, deyiladi Sudyalar oliy kengashi xabarida.

Kengash sud qarori qonuniy kuchda ekani va texnik xatolik bartaraf etilgani bois sudyaga nisbatan xizmat tekshiruvi oʻtkazishga yetarlicha asos yoʻq deb hisoblaydi. Biroq mavjud holat jamoatchilikda sud hokimiyatiga nisbatan notoʻgʻri tasavvurlar paydo qilishi ehtimolini yuzaga keltirgani eʼtiboridan Toshkent shahar sudiga uning sabablarini oʻrganishni tavsiya qildi.