Rossiya tergov qoʻmitasining maʼlum qilishicha, Moskvada yadroviy himoya kuchlari uchun masʼul boʻlgan yuqori martabali rossiyalik General-leytenant elektr skuterga yashiringan bomba tufayli halok boʻldi.

Radiologik, kimyoviy va biologik mudofaa qoʻshinlari boshligʻi general-leytenant Igor Kirillov seshanba kuni Ryazanskiy prospektidagi turar-joy binosi oldida oʻldirilgan.

“Rossiya Federatsiyasi Qurolli kuchlarining radiatsiya, kimyoviy va biologik himoya kuchlari boshligʻi Igor Kirillov va uning yordamchisi halok boʻldi”, — deyiladi tergov qoʻmitasi xabarida.

Rossiyaning Telegram-kanallarida chop etilgan fotosuratlarda vayronalar bilan qoplangan binoning kirish qismi va qonga boʻyalgan qor ostida yotgan ikki jasad aks etgan. Ushbu holat yuzasidan jinoiy ish ochilgan. Hodisa roʻy bergan joyda kuzatuv kameralari boʻlmagan va bundan aholi koʻp yillardan buyon shikoyat qilib kelishardi.

Rossiya endi harbiy kimyoviy arsenalga ega emasligini aytmoqda, biroq mamlakat zaharli qurollardan foydalanishda shaffoflikni oshirish uchun bosimga duch kelyapti.

Ukraina Xavfsizlik xizmati SBU 2022-yil fevralidan beri jang maydonida 4800 dan ortiq kimyoviy qurol, xususan K-1 jangovar granatalar qoʻllanganini qayd etgan.