Россия тергов қўмитасининг маълум қилишича, Москвада ядровий ҳимоя кучлари учун масъул бўлган юқори мартабали россиялик Генерал-лейтенант электр скутерга яширинган бомба туфайли ҳалок бўлди.

Радиологик, кимёвий ва биологик мудофаа қўшинлари бошлиғи генерал-лейтенант Игор Кириллов сешанба куни Рязанский проспектидаги турар-жой биноси олдида ўлдирилган.

«Россия Федерацияси Қуролли кучларининг радиация, кимёвий ва биологик ҳимоя кучлари бошлиғи Игор Кириллов ва унинг ёрдамчиси ҳалок бўлди», — дейилади тергов қўмитаси хабарида.

Россиянинг Телеграм-каналларида чоп этилган фотосуратларда вайроналар билан қопланган бинонинг кириш қисми ва қонга бўялган қор остида ётган икки жасад акс этган. Ушбу ҳолат юзасидан жиноий иш очилган. Ҳодиса рўй берган жойда кузатув камералари бўлмаган ва бундан аҳоли кўп йиллардан буён шикоят қилиб келишарди.

Россия энди ҳарбий кимёвий арсеналга эга эмаслигини айтмоқда, бироқ мамлакат заҳарли қуроллардан фойдаланишда шаффофликни ошириш учун босимга дуч келяпти.

Украина Хавфсизлик хизмати СБУ 2022 йил февралидан бери жанг майдонида 4800 дан ортиқ кимёвий қурол, хусусан К-1 жанговар гранаталар қўлланганини қайд этган.