Rossiya Ukrainaga qarshi 188 ta dron yordamida tungi hujum uyushtirdi. Bu hujum bir kechadagi eng katta hujum sifatida qayd etildi. Ukraina havo kuchlari maʼlumotlariga koʻra, bu dronlar 17 hududni nishonga olgan boʻlib, uy-joylar va milliy energiya tarmogʻiga jiddiy zarar yetkazgan. Koʻpchilik dronlar urib tushirilganiga qaramay, hujumlar sezilarli darajada vayronagarchiliklar keltirib chiqardi.

Qayd etilishicha, Doneskdagi keskinlik oshmoqda. Rossiya Donesk hududida oldinga siljishni davom ettiryapti. Pokrovsk va Kuraxove yaqinida qattiq toʻqnashuvlar boʻlayotgani aytilgan. Shuningdek, bu hududlar Rossiya kuchlarining strategik nishonlaridan biriga aylangan. Tahlilchilar, Rossiyaning mayda yutuqlari jamlanib, Ukraina mudofaasiga bosimni oshirayotganini taʼkidlashmoqda.

Qish yaqinlashar ekan, Ukrainada elektr taʼminoti barqarorligiga boʻlgan xavotirlar kuchaygan. Rossiyaning doimiy hujumlari energiya infratuzilmasiga zarar yetkazib, aholining qiyinchiliklarga duch kelishiga sabab boʻlmoqda. Shu bilan birga, AQSHda yangi prezident saylanganidan keyin koʻrsatiladigan yordamning qanday boʻlishi borasida ham noaniqlik mavjud.

Aytish mumkinki, Rossiyaning dron strategiyasi Kiyev uchun qiyinchilik keltirib chiqargan. Xususan Ukraina hukumati Moskvaning dron, raketa va boshqariluvchi bombalar bilan uyushtirayotgan hujumlari tinch aholiga katta zarar keltirayotganidan shikoyat qilgan.

Yana bir eʼtiborga molik holat Rossiya Kursk hududida ukrainlar tomonida jang qilayotgan britaniyalik askarni hibsga olganini eʼlon qilishi bilan bogʻliq. James Skott nomi bilan tanilgan bu shaxs Rossiya sudida yopiq eshiklar ortida soʻroqqa tutilgan, ammo unga qoʻyilgan ayblovlar aniq emas. Rossiya hukumatiga koʻra, bu qaror dushanba kuni chiqarilgan boʻlsa-da, batafsil maʼlumot taqdim etilmagan.

Ukraina Rossiyaning tobora kuchayib borayotgan hujumlariga qarshi turishga harakat qilmoqda. Shu bilan birga, xalqaro yordamning kelgusi qish mavsumida qanday davom etishi Ukrainani qiynayotgan asosiy masalalardan biri boʻlib qolyapti.