Rejissyor Ayub Shahobiddinovning “Rangsiz tushlar” filmi premyerasi oʻtkazildi

01:25 25 Dekabr 2020 Madaniyat
2993 0

24-dekabr kuni Yoshlar ijod saroyida «Oʻzbekkino» Milliy agentligi buyurtmasiga binoan rejissyor Ayub Shahobiddinov tomonidan suratga olingan “Rangsiz tushlar” badiiy filmining premyerasi boʻlib oʻtdi.

Namoyish avvalida «Oʻzbekkino» MA Bosh direktori birinchi oʻrinbosari Shuhrat Rizayev hamda «Oʻzbekfilm» DUK direktori Fotih Jalolovlar soʻzga chiqib, ijodiy guruhni ilk katta premyera bilan tabrikladi. 

Rejissyor Ayub Shahobiddinovning maʼlum qilishicha, film ssenariysi bundan 7 yil oldin yozilgan.

“Filmda oʻn yetti yildan soʻng oʻz vataniga, oilasiga qaytgan oʻzbek ayoli haqida hikoya qilinadi. Biz odamlarning oʻz yaqinlarini oʻz holicha, oʻtmishi bilan va mumkin boʻlgan xatolar bilan qabul qilishni istamasligini koʻrsatmoqchi edik”, deydi Ayub Shahobiddinov.

 

“Rangsiz tushlar” filmi uzoq yillik mahkumlikdan soʻng, ozodlikka chiqqan ayol – Kashmiraning jamiyatga moslashishidagi qiyinchiliklari haqida hikoya qiladi. Rollarda Feruza Saidova, Karim Mirhodiyev, Shohida Ismoilova, Lola Eltoyeva, Doniyor Hafizov, Bekzod Abdumuhitov, Asal Abdullayeva va boshqalar. Ssenariy muallifi Umid Hamdamov, postanovkachi operator Azizbek Arziqulov, rassom Shamshod Ibrohimov, kompozitor Ubaydullo Karimov.

Maʼlumot uchun: “Rangsiz tushlar” filmi bugungacha Anapa shahridagi «Kinoshok», Qozon shahridagi “Musulmon filmlari festivali”, «Fresko» (Armaniston) va «Lukaniya» (Italiya) kinofestivallarining asosiy dasturida qatnashgan.

Film shu kungacha Italiya, Rossiya, Armaniston, Afgʻoniston, Bangladesh, Indoneziya davlatlarida namoyish etildi. Film 4 ta festival asosiy konkursida qatnashdi va 2021-yil boshida yana ikkita festivalda ishtirok etishi kutilmoqda.

Inobat AHATOVA, 

“Xalq soʻzi”

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?