Режиссёр Аюб Шаҳобиддиновнинг «Рангсиз тушлар» фильми премьераси ўтказилди

01:25 25 Декабрь 2020 Маданият
2992 0

24 декабрь куни Ёшлар ижод саройида «Ўзбеккино» Миллий агентлиги буюртмасига биноан режиссёр Аюб Шаҳобиддинов томонидан суратга олинган «Рангсиз тушлар» бадиий фильмининг премьераси бўлиб ўтди.

Намойиш аввалида «Ўзбеккино» МА Бош директори биринчи ўринбосари Шуҳрат Ризаев ҳамда «Ўзбекфилм» ДУК директори Фотиҳ Жалоловлар сўзга чиқиб, ижодий гуруҳни илк катта премьера билан табриклади. 

Режиссёр Аюб Шаҳобиддиновнинг маълум қилишича, фильм сценарийси бундан 7 йил олдин ёзилган.

«Фильмда ўн етти йилдан сўнг ўз ватанига, оиласига қайтган ўзбек аёли ҳақида ҳикоя қилинади. Биз одамларнинг ўз яқинларини ўз ҳолича, ўтмиши билан ва мумкин бўлган хатолар билан қабул қилишни истамаслигини кўрсатмоқчи эдик», дейди Аюб Шаҳобиддинов. 

«Рангсиз тушлар» фильми узоқ йиллик маҳкумликдан сўнг, озодликка чиққан аёл – Кашмиранинг жамиятга мослашишидаги қийинчиликлари ҳақида ҳикоя қилади. Ролларда Феруза Саидова, Карим Мирҳодиев, Шоҳида Исмоилова, Лола Элтоева, Дониёр Ҳафизов, Бекзод Абдумуҳитов, Асал Абдуллаева ва бошқалар. Сценарий муаллифи Умид Ҳамдамов, постановкачи оператор Азизбек Арзиқулов, рассом Шамшод Иброҳимов, композитор Убайдулло Каримов.

Маълумот учун: «Рангсиз тушлар» фильми бугунгача Анапа шаҳридаги «Киношок», Қозон шаҳридаги «Мусулмон фильмлари фестивали», «Фреско» (Арманистон) ва «Лукания» (Италия) кинофестивалларининг асосий дастурида қатнашган.

Фильм шу кунгача Италия, Россия, Арманистон, Афғонистон, Бангладеш, Индонезия давлатларида намойиш этилди. Фильм 4 та фестиваль асосий конкурсида қатнашди ва 2021 йил бошида яна иккита фестивалда иштирок этиши кутилмоқда.

Инобат АҲАТОВА, 

«Халқ сўзи»

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?

Кўп ўқилганлар

Янгиликлар тақвими

Кластер