Ispaniyaning “Real Madrid” futbol klubi 2024/25 moliyaviy yilini tarixiy moliyaviy natijalar bilan yakunladi. Klub yil davomida 24 million yevro sof foyda koʻrdi. Umumiy daromad hajmi esa 1 milliard 185 million yevroga yetib, oʻtgan yilga nisbatan 10 foizga oshdi. Bu orqali “Real Madrid” ketma-ket ikkinchi yil 1 milliard yevro daromad chegarasidan oshgan dunyodagi yagona futbol klubi boʻlib turibdi.

Klubning operatsion samaradorligi ham sezilarli darajada yaxshilandi. 2024/25 moliyaviy yilida “Real Madrid” oʻz tarixidagi eng yuqori operatsion daromad — 243 million yevroga erishdi. Transfer daromadlari hisobga olinmagan holdagi EBITDA esa 208 million yevroni tashkil etdi. Bu moliyaviy boshqaruvdagi intizom va daromad manbalarining kengayganini koʻrsatadi.

Yil yakuniga kelib, umumiy sarmoyaviy kapital 598 million yevroga, naqd mablagʻlar 166 million yevroga yetdi. Klubning sof qarzdorligi esa atigi 12 million yevro boʻlib, bu moliyaviy barqarorlik va kredit ishonchliligining yuqori darajada ekanidan dalolat beradi.

Klub tomonidan davlat byudjetiga ham katta hissa qoʻshildi — 2024/25-yilda “Real Madrid” tomonidan soliq va ijtimoiy toʻlovlar koʻrinishida jami 356 million yevro ajratildi. Bu klubning nafaqat sport, balki iqtisodiy va ijtimoiy masʼuliyatda ham yetakchi ekanini anglatadi.