Oʻzbekistonlik MMA jangchisi Ramazon Temirov UFC'dagi navbatdagi jangida Amerika vakili Charlz Jonsonni magʻlub etdi. Bu “Temurlan”ning ushbu tashkilotdagi ketma-ket ikkinchi gʻalabasi hisoblanadi.

Mazkur toʻqnashuv AQShning Nevada shtatida “UFC Fight Night 253” turniri doirasida boʻlib oʻtdi. Janglar oqshomining ilk bahsida oktagonga koʻtarilgan sportchilar toʻliq 3 raund davomida gʻalaba uchun kurashdi. Raundlar asosan tik oyoqda oʻtdi va yakunda ochkolar hisobi boʻyicha Temirovning qoʻli baland koʻtarildi.

Taʼkidlash joiz, Charlz Jonson ham chakana raqib emas edi. U bungacha UFC'da 10 ta jang oʻtkazgan boʻlib, shundan 7 ta gʻalaba, 3 magʻlubiyat qayd etgan. Jonson ketma-ket 4 ta jangdan iborat gʻalabali seriya bilan kelayotgandi, Temirov bugun ushbu seriyaga nuqta qoʻydi.

Maʼlumot uchun, eng yengil vazn toifasida jang olib boruvchi “Temurlan” UFC'dagi ilk jangini 2024-yilning oktyabrida amerikalik SiJey Vergaraga qarshi oʻtkazib, nokaut orqali gʻalaba qozongan edi. Oʻshanda uning bu harakatlari promoushen tomonidan yuqori baholanib, 50 ming dollarlik bonusga loyiq koʻrilgandi.