Foto: “Xalq soʻzi”

Botir Madiyorov/“Xalq soʻzi”. Quvasoy shahridagi “Bogʻbon” MFYda dehqonchilik va bogʻdorchilik drayver soha sifatida belgilangan boʻlib, 1412 ta aholi xonadonlari tomorqasida qulupnay, malina ekish orqali yaxshi daromad olinadi. Shuningdek, hududdagi salkam 1000 gektar mevazor bogʻdan gilos, shaftoli, oʻrik, behi, olmadan moʻl hosil olinib, xorijga eksport qilinmoqda.

Shu mahallada yashovchi Sardorbek Ahmadjonov bir necha yil Janubiy Koreyada ishlab, dehqonchilik sohasida ilm-fan yutuqlari, innovatsiyani oʻrgandi. Hozirda xonadoni tomorqasidagi 2 sotix issiqxonada Koreya tajribasi asosida qulupnay yetishtirishni yoʻlga qoʻygan. Oila aʼzolari yil davomida qulupnaydan oʻrtacha 80-100 million soʻm daromad topadi.

— Bu yil yana 50 dan ortiq xonadonda malina, qulupnay yetishtirishni yoʻlga qoʻyishni maqsad qilganmiz, — deydi “Bogʻbon” MFY hokim yordamchisi Sanobarxon Akbarova. — Ayni paytda mirishkor tomorqachilar xonadonida amaliy seminar oʻtkazishga tayyorgarlik koʻrilyapti. Unda oʻz tomorqasida qulupnay, malina ekish istagida boʻlgan oilalar uchun mahorat darsi oʻtkaziladi.