Videodan kadr

Qoraqalpogʻistonda patrul-post xizmati xodimi 10 million soʻm pora bilan ushlandi. Bu haqda Ichki ishlar vazirligi axborot xizmati xabar berdi.

Qayd etilishicha, 2001-yilda tugʻilgan fuqaro sodir etgan huquqbuzarligining jazo chorasini yengillashtirmoqchi boʻlib, har xil yechimlarni topishda oʻzi tamagirlik tuzogʻiga tushib qolayotganini sezgan. Shundan soʻng u Ichki ishlar vazirligi Shaxsiy xavfsizlik bosh boshqarmasi Qoraqalpogʻiston Respublikasi boʻyicha boshqarmasiga ariza bilan murojaat qilgan.

Murojaat asosida oʻtkazilgan tezkor tadbirda, tanishining muammoli ahvolidan foydalangan patrul-post xizmati xodimi uning yashash xonadoniga borib, profilaktika inspektori ish yurituvida boʻlgan materiallar boʻyicha ishni sud tibbiyot ekspertizasi orqali yengillashtirib berish evaziga 10 million soʻm olgan vaqtida ashyoviy dalillar bilan qoʻlga olingan.

Maʼlum qilinishicha, hozirda mazkur holat yuzasidan post-patrul xizmati xodimiga nisbatan Jinoyat kodeksining 168-moddasi (Firibgarlik) 3-qismi “v” bilan ish ochilib, “uy qamogʻi” ehtiyot chorasi qoʻllangan.