Bugungi yuksak texnologiyalar davrida raqamli transformatsiya jarayoni bozorlar faoliyatiga ham keng joriy etilayotgani eʼtiborga molik.

Oliy Majlis Senatining Sud-huquq masalalari va korrupsiyaga qarshi kurashish qoʻmitasi raisi Abdulhakim Eshmuratov Qoʻqon shahridagi Markaziy dehqon bozorida savdo rastalaridan foydalanish uchun haq toʻlash, bozorda koʻrsatilayotgan xizmatlar va boshqa toʻlovlarni raqamlashtirish, ochiq va shaffof tizim yaratish borasida erishilgan natijalar bilan tanishib, masʼullar bilan muloqotda boʻldi.

— Yaqinda davlatimiz rahbari raisligida korrupsiyaga qarshi kurashish va uning oldini olish borasida oʻtkazilgan yigʻilishda bu borada ustuvor vazifalar belgilab berildi, — deydi Qoʻqon shahar Markaziy dehqon bozori menejeri Ilhom Usmonov. — Ayni jarayonda shahrimizdagi bozorlar hamda yirik savdo markazlarida raqamlashtirish ishlari olib borilmoqda.

Bu yangilik samarasi birgina bizning bozor misolida ham yaqqol namoyon boʻlib, har bir jarayon qonuniy asosda tashkil etilishiga erishilyapti. Eng muhimi, bir oy ichida tushumlar miqdori sezilarli darajada oshdi.

Parlament masʼul qoʻmitalari hamda mahalliy Kengashlar deputatlari bilan hamkorlikda korrupsion holatlarning kelib chiqish sabablarini oʻrganish va unga barham berish yoʻnalishida amalga oshirilayotgan hamkorlik ijro intizomini taʼminlashda muhim ahamiyatga ega.

Aytish joiz, Qoʻqon shahridagi barcha bozorlarda bu boradagi ishlar koʻlamini oshirish maqsadida keng jamoatchilik vakillari ishtirokida kunlik nazorat va monitoring ishlarini olib borish yoʻlga qoʻyilgan.

Botir MADIYOROV

“Xalq soʻzi”.