Botir MADIYOROV/“Xalq soʻzi”. Fargʻona viloyati hokimligida Turkiyaning “Eser Hotels” premium mehmonxonalar tarmogʻi rahbari Ertan Xaldun boshchiligidagi turk tadbirkorlari delegatsiyasi bilan uchrashuv boʻlib oʻtdi.

Uchrashuvda Fargʻona viloyati hokimi boshchiligidagi viloyat delegatsiyasi Turkiyaga amaliy tashrifi davomida bir qator istiqbolli kelishuvlarga erishilgani taʼkidlandi. Bugungi muloqot bu boradagi kelishuvlarning amaliy samarasi ekani qayd etilib, Qoʻqon va Fargʻona shaharlarida “Eser Hotels” brendi ostida besh yulduzli mehmonxona bunyod etish loyihasi ijrosi koʻrib chiqildi.

— Ikki kunlik oʻrganish mobaynida Fargʻona viloyatining iqtisodiy va turizm salohiyati bizda katta taassurot qoldirdi, — deydi Ertan Xaldun. — Dastlabki bosqichda Qoʻqon shahrida qurilishi rejalashtirilgan mehmonxona konsepsiyasi tayyor boʻladi. Loyihani tez fursatda amalga oshirish uchun investitsiya kiritishga tayyormiz.