Sulaymon Turdiyev — Vobkent tumanidagi “Panob” mahallasining qatʼiyatli insonlaridan. Bunday deyishimizning boisi bor. U yoshligidanoq qishloqqa kichik sanoatni olib kirish, tadbirkorlik faoliyatini yoʻlga qoʻyishni niyat qilgandi.

— Oʻtgan yillar davomida turdosh korxonalarda ishlab, oyoq kiyimlari tayyorlash yoʻnalishi borasida muayyan tajriba toʻpladim, — deydi u. — Bozordagi talabni oʻrgandim. Qishloqda ham raqobatbardosh mahsulot ishlab chiqarish imkoniyati mavjudligiga ishonch hosil qildim. Keyin esa amaliy ishga kirishdim.

Sulaymon Turdiyev rahbarligida Yangi hayot qishlogʻida ish boshlagan “Taraqqiyot shoys” korxonasi xorijdan keltirilgan asbob-uskunalar bilan jihozlangan. Biznes loyihani toʻliq amalga oshirish uchun jami 2 milliard 340 million soʻm miqdorida mablagʻ sarflandi. Bu sarmoyaning salmoqli qismini moliyaviy muassasa tomonidan ajratilgan kredit tashkil etdi. Korxonada 10 nafar ishchi mehnat qilmoqda. Ular saʼy-harakati bilan yiliga 12 ming dona poyabzal tayyorlash koʻzda tutilgan. “Taraqqiyot shoys” tamgʻasi tushirilgan mahsulotlarni ayni damda yurtimiz shaharlari savdo doʻkonlari peshtaxtalarida koʻrish mumkin.

Istam IBROHIMOV

“Xalq soʻzi”