Qashqadaryo viloyati ftiziatriya va pulmonologiya markaziga qamashilik 70 yoshli momo qorni kattalashib ketayotganidan shikoyat qilib murojaat qildi. Mutaxassislarning qayd etishicha, tashqi koʻrik paytida bemorning qorni 37-38 haftalik homilador ayolni eslatgan. Bu haqda viloyat sogʻliqni saqlash boshqarmasi axborot xizmati xabar berdi.

–Bemor momo 1987-yilda sobiq respublika ftiziatriya va pulmonologiya ilmiy tekshirish institutida oʻpka sili bilan davolangan ekan, – deydi markaz bosh shifokori Azimjon Obilov. – MRT tekshiruvida unda kistoz oʻzgarishlar aniqlandi, Rentgen tekshiruvida oʻpkada sil kasalligi aniqlandi. Qorin boʻshligʻida ham sil boʻlishi mumkinligini inobatga olib bir oydan ortiq muddat davomida muolajalar qilindi. Ammo dori-darmonlar bilan davolash umuman samara bermadi. Shundan soʻng shifoxonada konsilium tashkil qilinib, jarrohlik amaliyoti oʻtkazilishiga kelishildi.

Qizigʻi, momoning oʻzi ham “bolam, hamma vrachlaringni yigʻib, konsilium qilinglar, nevaralarimning xursandchiliklarini koʻrishim uchun yana 4 yilgina yashasam”, – deya koʻzlariga yosh oldilar.

Mutsinoz sistoadenoma tashxisi qoʻyilgan bemorning yoshini hisobga olsak, unga “narkoz” berish va “operatsiya” oʻtkazish borasida shifokorlarimizda kattagina hadik bor edi. Bemor spinal anestiziya orqali jarrohlik muolajasiga olindi.

1 soatu 20 daqiqa davom etgan operatsiya davomida gemodinamik koʻrsatkichlar qatʼiy nazorat qilingan holda bemorning uygʻoq holatida barcha imkoniyatlar ishga solindi.

Jarrohlik amaliyoti natijasida bemorning qornidan 9 kilogramm shilliq modda olib tashlandi. Ayni paytda bemor momo oʻzini juda yaxshi his etmoqda, deb yozadi NasafNews manbasi.