Bosh prokuratura huzuridagi Departament Qashqadaryo viloyatida noqonuniy tamaki va alkogol mahsulotlari savdosi bilan shugʻullanib kelgan shaxslarni ushlagan. Bu haqda Departamentning xabar berdi.

Maʼlum qilinishicha, Bosh prokuratura huzuridagi Departamentning Mirishkor tumani boʻlimi tomonidan Qarshi shahridagi “Xontepa” MFY hududida oʻtkazilgan tezkor tadbirda qonunga xilof ravishda tamaki mahsulotlari savdosi bilan shugʻullanib kelgan shaxsni qoʻlga kiritdi.

Qayd etilishicha, I.N. “L.E.” MCHJga qarashli savdo doʻkonida turli nomdagi jami 2 ming 052 quti umumiy bahosi 70 million soʻmlik tamaki mahsulotlarini sotish maqsadida saqlab kelayotganligi aniqlanib, ushbu tamaki mahsulotlari ashyoviy dalil sifatida olingan.

Bundan tashqari, Departamentning Gʻuzor tuman boʻlimi, IIB va soliq inspeksiyasi xodimlari hamkorligida “Xoʻjaguzar” MFY hududidagi savdo doʻkonida oʻtkazilgan tezkor tadbirda fuqaro O.S. noqonuniy alkogol va tamaki mahsulotlari savdosi bilan shugʻullanib kelayotganligi aniqlanib, 42 turdagi 1030 dona isteʼmolga yaroqsiz alkogol va 16 turdagi 1804 quti tamaki mahsulotlari ashyoviy dalil sifatida hujjatlashtirilgan.

“Mazkur holatlar yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.

Avvalroq, qaysi yengil avtomobil Oʻzbekistonda koʻproq ishlab chiqarilgani haqida xabar berilgandi.