Arxiv foto

Yaponiyalik olimlar keksalik yoshida velosipedda sayr qilish va oʻlim xavfining kamayishi oʻrtasidagi oʻzaro bogʻliqlikni aniqlashdi. Tadqiqot natijalari “Transportation Research Part F: Traffic Psychology and Behaviour” jurnalida chop etilgan.

Tahlil 2013-yildan 2023-yilgacha boʻlgan davrda keksa yaponlarning salomatligi va jismoniy faolligi haqidagi maʼlumotlarni qamrab oldi. Maʼlum boʻlishicha, kuzatuvlarning boshida muntazam ravishda velosiped haydashni boshlagan ishtirokchilar keyingi yillarda organizm faoliyatidagi buzilishlarga kamroq duch kelishgan.

Salomatlik uchun eng katta yaxshilanish velosipedda sayr qilishni muntazam davom ettirgan yoki buni keyinroq boshlaganlarda kuzatildi. Ayniqsa, haydovchilik guvohnomasiga ega boʻlmagan keksa yoshdagi odamlar orasida sezilarli samara qayd etildi.

Tadqiqot mualliflarining xulosasiga koʻra, velosipedda sayr qilish jismoniy faollikni saqlash va kayfiyatni yaxshilashga yordam beradi. Ular keksa yoshdagi aholi oʻrtasida velosipedda sayohat qilish xavfsizligi va jozibadorligini oshirish maqsadida velosipedlar uchun infratuzilmani rivojlantirish muhimligini taʼkidlaydilar.