Bobur – hozirgi “Doʻstlik” bogʻi shahar hokimligiga qaytarildi va uni poytaxt hokimligi tiklaydi. Toshkent shahar hokimi Jahongir Ortiqxoʻjayev aholi bilan maslahatlashish, barcha takliflarni toʻplab umumlashtirgan holda bogʻ rekonstruksiyasida qoʻllash topshirigʻini berdi.

5-may kuni Toshkent shahar hokimining oʻrinbosari – Mahalla va oilani qoʻllab-quvvatlash boshqarmasining boshligʻi Furqat Mahmudxoʻjayev va Yakkasaroy tumanining hokimi Anvar Sayfutdinov ishtirokida bogʻ taqdiriga befarq boʻlmagan faol aholi vakillari bilan uchrashuv tashkil etildi. 

Boʻlajak boqqa nisbatan qoʻyilgan eng koʻp qaytarilgan talablar: muntazam sugʻoriladigan koʻplab daraxtlar va koʻkalamzorlashtirish, velosiped yoʻlaklaridan ajratilgan sayr uchun yoʻlaklar, oʻrindiqlar, favvoralar, sport maydonchalari, qayiqlar mavjud koʻl, skeyt va roliklar uchun hudud, shaxmat, bilyard, kutubxona, bolalar uchun toʻgaraklar, bepul kirish imkoniyati, nogironlar uchun qulay muhit va hokazo.

Takliflarni toʻplash uchun ijtimoiy tarmoqlarda guruh tashkil qilish hamda takliflarni umumlashtirish uchun besh kishidan iborat tashabbuskor guruhni tuzishga kelishildi.