Bugun onlayn nashrimizda “Qadimiy qabr yonidagi hojatxona. Yoxud manqurtlikning bir koʻrinishi” nomli maqolasini e'lon qilgandik. Material ijtimoiy tarmoqlarda ham katta aks-sado berdi. 

Buxoro viloyati madaniy meros boshqarmasi ushbu maqola boʻyicha rasmiy munosabat bildirdi.

«Maqolada Buxoro shahrining Saodat koʻchasida joylashgan, manbalarda XI asrda yashab oʻtgani qayd etilgan Xoʻja Halimiddin Dehmuniyning qabri yaqinida 30-sonli maktabgacha taʼlim muassasasining ishchilar uchun moʻljallangan hojatxonasi qurilganligi aytib oʻtilgan.

Holat yuzasida viloyat hokimi oʻrinbosari B.Shahriyorov, Buxoro shahar hokimi Oʻ.Jumayev hamda viloyat madaniy meros boshqarmasi, viloyat maktabgacha taʼlim boshqarmasi, viloyat sanitariya-epidemiologiya va osoyishtalik markazi, viloyat musulmonlar idorasi, viloyat qurilish bosh boshqarmasi mutaxassislari tomonidan darhol joyiga chiqib oʻrganish ishlari olib borildi. Oʻrganish natijasida qabr yaqinida joylashgan hojatxonani bartaraf etishga kelishildi va mazkur hojatxona shu kunning oʻzida buzib tashlandi.

Shuningdek, maqolada mazkur maktabgacha taʼlim muassasasi yonida qadimiy hovli joylashganligi va bu qadimiy uy qarovsizlik oqibatida tutday toʻkilib ketganligi aytib oʻtilgan.

Mazkur qadimiy hovli-joy ham masʼullar tomonidan koʻzdan kechirilib, hovlini moddiy madaniy merosning koʻchmas mulk obyektlari milliy roʻyxatiga kiritish choralarini koʻrish boʻyicha topshiriqlar berildi deyiladi ushbu munosabatda.