Foto: Videodan kadr

Kecha Parijdagi Paralimpiya oʻyinlarining navbatdagi kunida hamyurtimiz Bobur Omonov yadro uloqtirish bahslarida oltin medalni qoʻlga kiritdi. Bugun sportchimiz bilan Prezident Shavkat Mirziyoyev telefon orqali muloqot qildi.

Davlatimiz rahbari Bobur Omonovni ikki karra Paralimpiya chempionidek sharafli nomga sazovor boʻlgani hamda 2021-yilda oʻzi oʻrnatgan Paralimpiada rekordini yangilagani bilan dildan qutlab, ushbu natija Oʻzbekiston paralimpiya harakati tarixida muhim voqea boʻlganini qayd etdi. Bu galgi oʻyinlarda ham yuksak mahoratini yana bir bor tasdiqlash yoʻlida unga koʻmakdosh boʻlgan murabbiylari va yaqinlariga rahmat aytdi.

Chempion xalqimiz ishonchini oqlaganidan xursandligini bildirib, terma jamoamizning, shu jumladan oʻzining muvaffaqiyatli chiqishlari Oʻzbekistonda Prezidentimiz rahbarligida sportga qaratilayotgan alohida eʼtibor va yaratilayotgan sharoitlar tufayli ekanini taʼkidladi.

Fursatdan foydalanib, Prezident kecha sovrindor boʻlgan sportchilarimizni tabriklab, bugungi bellashuvlarda qatnashadigan hamyurtlarimizga omad tiladi.