Oʻzbekistondagi eng koʻp MCHJ qaysi sohada faoliyat yuritmoqda?

Oʻzbekiston Respublikasi Milliy statistika qoʻmitasi maʼlumotlariga koʻra, 2025-yil 1-mart holatiga mamlakatda jami 285 ming 459 ta masʼuliyati cheklangan jamiyat (MCHJ) faoliyat yuritmoqda.

Eng koʻp masʼuliyati cheklangan jamiyatlar savdo sohasida faoliyat olib boryapti. Bu tarmoqda jami 105 ming 732 ta korxona ishlayotgani qayd etilgan. Keyingi oʻrinda sanoat sohasi boʻlib, u yerda 40 ming 490 ta MCHJ faoliyat yuritmoqda. Qurilish sohasi esa uchinchi oʻrinni egallab, 24 ming 710 ta masʼuliyati cheklangan jamiyatni oʻz ichiga olgan.

Shuningdek, qishloq, oʻrmon va baliqchilik xoʻjaligida 24 ming 636 ta, yashash va ovqatlanish boʻyicha xizmatlar sohasida 15 ming 929 ta, tashish va saqlash sohasida 14 ming 658 ta, axborot va aloqa sohasida 8 ming 666 ta, sogʻliqni saqlash va ijtimoiy xizmatlar koʻrsatish sohasida esa 6 ming 967 ta MCHJ faoliyat yuritmoqda.

Bundan tashqari, boshqa sohalar boʻyicha 43 ming 671 ta masʼuliyati cheklangan jamiyat roʻyxatga olingan. Ushbu maʼlumotlar mamlakatimizda kichik va oʻrta biznes rivojlanishi hamda iqtisodiy faollik qaysi tarmoqlarga koʻproq yoʻnaltirilayotganini koʻrsatib beradi.

Oʻzbekiston iqtisodiyotining savdo, sanoat va qurilish kabi tarmoqlarga qaratilganligi koʻplab yangi ish oʻrinlari yaratish, ichki va tashqi bozorga moslashish hamda milliy iqtisodiyotni mustahkamlash uchun muhim omil boʻlib xizmat qilmoqda. Kelgusida esa boshqa sohalar, jumladan, axborot texnologiyalari va sogʻliqni saqlash yoʻnalishlarida ham yanada koʻproq korxonalar tashkil etilishi kutilyapti.