“Oʻzgidromet” 2024-yilning iyun oyi Oʻzbekistonda qanday boʻlgani haqida maʼlumot berdi.

Maʼlum qilinishicha, XXI asrdagi koʻpgina iyun oylari kabi, bu yilning iyun oyi ham issiq boʻldi. Oʻrtacha oylik harorat meʼyordan 1-2,5 darajaga koʻp boʻldi. Oʻzbekiston hududining katta qismida 2024-yil iyun oyi barcha kuzatuv yillari uchun eng issiq iyun oylari beshligiga kirdi.

Toshkentda oʻtgan iyun oyi 2021 va 2023-yillarning iyun oylaridan soʻng uchinchi oʻrinni egalladi, ular meʼyordan 2,8-3,2 darajaga issiqroq boʻldi. Oy davomida harorat foni deyarli tekis boʻlishi qayd etildi. Oʻzbekiston hududining katta qismida iyun oyida maksimal harorat asosan 32-37 daraja, janubda va choʻl hududlarda 36-41 daraja atrofida boʻldi.

Eng issiq ob-havo 27—28-iyun kunlari kuzatildi. Ushbu kunlarda harorat 39-41 darajagacha, janubda va choʻl hududlarda 42-43 darajagacha koʻtarildi. Bu iyun oyi uchun eng yuqori harorat qiymatlari emas. Iyun oyidagi maksimal havo harorati rekordlari 42-44 darajani, janubda va choʻl hududlarda 45-47 darajani tashkil etadi.

Toshkentda 154-yillik meteorologik kuzatuvlar uchun 1914-yil iyun oyining mutlaq maksimal harorati 43,0 daraja boʻlib qoldi. Koʻpincha yoz faslida kuzatilgani kabi, 2024-yil iyun oyida yogʻingarchilik juda notekis boʻldi. Oʻzbekiston hududining katta qismida oʻtgan iyun oyi ekstremal quruq oy deb tavsiflanishi mumkin. Oy davomida yogʻingarchilik miqdori 0,0-4 mm, ayrim joylarda 6-11 mm boʻldi.

Faqat Andijon, Fargʻona viloyatlarida va Qoraqalpogʻiston Respublikasining shimolida yomgʻir yogʻishi jadalroq boʻldi. Oy davomida yogʻingarchilik miqdori baʼzi joylarda 15-22 mm ga yetdi. Yomgʻir juda kamdan-kam hollarda yogʻdi (oyda 1-3 kun) va qisqa muddatli xarakterga ega boʻldi.

Respublikaning togʻoldi va togʻli hududlarida qisqa muddatli yomgʻirlar tez-tez kuzatildi va ayrim kunlarda yomgʻir kuchli — bir necha soat ichida 10-20 mm gacha boʻldi. Bir oy davomida yogʻingarchilikning umumiy miqdori 25-35 mm ga yetdi, Fargʻona viloyati togʻlarida va Toshkent, Qashqadaryo viloyatlarining baland togʻli hududlarida 60-100 mm gacha boʻlishi kuzatildi.

Jizzax, Qashqadaryo, Surxondaryo, Namangan, Fargʻona viloyatlarining ayrim togʻoldi va togʻli hududlarida jala yomgʻirlar hisobiga sel-suv toshqin hodisalari yuzaga keldi.

Respublika boʻyicha baʼzi joylarda shamol tezligi 15-20 m/s gacha, Qoraqalpogʻiston Respublikasi, Navoiy, Qashqadaryo viloyatlarining ayrim joylarida shamolning kuchayishi 22-25 m/s ga yetdi. Respublika shimolida, janubida va choʻl hududlarida shamolning kuchayishi changli boʻronlar bilan qayd etildi, koʻrinuvchanlik 1000 m gacha yomonlashdi.