Foto: Qonunchilik palatasi matbuot xizmati

Oʻzbekiston Respublikasi Oliy Majlisi Qonunchilik palatasining navbatdagi majlisida “Oʻzbekiston Respublikasining Tadbirkorlik kodeksini tasdiqlash toʻgʻrisida”gi qonun loyihasi ikkinchi oʻqishda moddama-modda muhokama qilindi va uchinchi oʻqishda qabul qilindi. Bu haqda Qonunchilik palatasi matbuot xizmati xabar bergan.

Deputatlar ushbu kodeksdan koʻzlangan asosiy maqsad tadbirkorlik sohasidagi munosabatlarni yagona hujjat bilan tartibga solish, davlatning tadbirkorlik sohasiga aralashuvini kamaytirish, shuningdek, tadbirkorlik sohasida yagona yondashuvni belgilash ekanligini bildirgan.

Maʼlum qilinishicha, ushbu loyiha bilan tadbirkorlik subyektlari kichik, oʻrta va yirik toifalarga ajratilmoqda.

Shuningdek, deputatlar tomonidan birinchi oʻqilishda berilgan barcha takliflar Byudjet va iqtisodiy masalalar qoʻmitasining ishchi guruh yigʻilishlarida chuqur tahlil qilinib, ularning aksariyat qismi hujjat matnida oʻz aksini topdi.

Qayd etilishicha, kodeks fermer va dehqon xoʻjaliklarining yer uchastkalaridan foydalanish va ularning mulkiy huquqlari, shuningdek, ijtimoiy korxonalarning huquqlari kafolatlarini mustahkamlovchi normalar bilan boyitilgan.

Muhokamalar davomida deputatlar qonun loyihasi har tomonlama maromiga yetkazilgani bildirib, qonun loyihasini uchinchi oʻqishda qabul qilishdi.

Avvalroq, Doniyor Gʻaniyev Oliy Majlis Qonunchilik palatasi deputatligidan ketgani haqida xabar berilgandi.