Soʻnggi kunlarda Oʻzbekistonda havo harorati keskin sovib ketdi. Xoʻsh, sovuq ob-havo qachon chekina boshlaydi? “Xalq soʻzi” nashri ushbu savol bilan «Oʻzgidromet»ga murojaat qildi.

«Oʻzgidromed»ning nashrimizga maʼlum qilishicha, 10-yanvardan boshlab havo harorati sekin-asta koʻtariladi va 2-7 daraja iliq boʻladi.

«Yangi 2021-yil keldi, ammo bizning mamlakatimiz boʻylab ob-havo sharoitini hali ham markazi Sibir hududlari ustida joylashgan sovuq antitsiklon periferiyasi belgilamoqda. Yangi yilning birinchi ish haftasi davomida juda yuqori bosimli maydon, anomal sovuq ob-havoni keltiradi.

Kechalari sovuq 5-10 darajagacha, shimolda va choʻl hududlarida esa 12-17 darajagacha pasayadi, hafta oxirigacha esa kunduz kunlari havo harorati 0-5 daraja sovuqdan oshmaydi. Hafta davomida havo harorati oʻrtacha yillik qiymatlardan 8-10 darajaga past boʻladi.

Respublikaning baʼzi joylarida tuman kuzatiladi. Ushbu davrda togʻli hududlarda qor koʻchishi xavfi bor», dedi Axborot xizmati rahbari.

Inobat AHATOVA,

“Xalq soʻzi”.