Bugun, 5-noyabr kuni Qatarda oʻtkazilayotgan U-17 Jahon chempionatining guruh bosqichi uchrashuvlari davom ettirildi. Kun doirasidagi bahsda Oʻzbekiston oʻsmirlar terma jamoasi Paragvay milliy jamoasi ustidan 2:1 hisobida muhim gʻalaba qozondi.

Uchrashuvda hisob 25-daqiqada ochildi — Azizbek Abdumoʻminov raqib darvozasini ishgʻol etdi. 42-daqiqada “Mashʼal” klubi tarbiyalanuvchisi yana bir bor gol urib, dublini qayd etdi va Oʻzbekistonni gʻoliblikka olib chiqdi.

Ikkinchi boʻlimning 89-daqiqasida Paragvay terma jamoasi penalti orqali bir gol qaytarishga muvaffaq boʻldi, ammo hisobni tenglashtirish uchun vaqt yetishmadi.

Shu tariqa, uchrashuv 2:1 hisobida Oʻzbekiston oʻsmirlari foydasiga hal boʻldi. Bu gʻalabadan soʻng “oq boʻrilar” guruhda ikkinchi oʻringa koʻtarildi. “J” kvartetining dastlabki oʻyinida Panamani 4:1 hisobida taslim etgan Irlandiya oʻsmirlar terma jamoasi birinchi oʻrinda bormoqda.

Maʼlumot uchun, Oʻzbekiston U-17 terma jamoasi guruhdagi navbatdagi bellashuvini 8-noyabr kuni aynan Irlandiya oʻsmirlar jamoasiga qarshi oʻtkazadi.