Oʻzbekiston Respublikasi Oliy Majlisi Senati Raisi Tanzila Narbayeva boshchiligidagi Oʻzbekiston parlamenti delegatsiyasi “Markaziy Osiyo mamlakatlari parlamentlari: mintaqani har tomonlama rivojlantirish boʻyicha samarali yechimlar” mavzusidagi Markaziy Osiyo davlatlarining III parlamentlararo forumida ishtirok etish uchun Bishkek shahriga yetib keldi.

Forumning maqsadi Markaziy Osiyo mamlakatlarining barqaror iqtisodiy oʻsishni taʼminlash, migratsiya jarayonlarini tartibga solish va raqamli muhitni rivojlantirish borasida parlamentlararo hamkorligini mustahkamlashdan iborat.

III parlamentlararo forum davomida “Migratsiya va mehnat oqimlari: fuqarolar huquqlarini qonuniy taʼminlash va iqtisodiyot barqarorligi”, “Markaziy Osiyo mamlakatlarida investitsiya muhitini yaxshilash va iqtisodiyotning shaffofligini oshirish boʻyicha qonunchilik choralari”, “Parlamentlar va raqamli suverenitet: kiberxavfsizlik, raqamli muhitni huquqiy tartibga solish” kabi mavzular muhokama qilinishi nazarda tutilgan.

Forum doirasida Senat Raisi Tanzila Narbayevaning parlamentlar vakillari bilan mintaqaviy hamkorlik, parlament diplomatiyasi va qoʻshma tashabbuslarni qoʻllab-quvvatlashning dolzarb masalalarini muhokama qilish uchun qator ikki tomonlama uchrashuvlari oʻtkazilishi ham rejalashtirilgan.