Senatning Sud-huquq masalalari va korrupsiyaga qarshi kurashish qoʻmitasi raisi A.Eshmuratov boshchiligidagi Oʻzbekiston Oliy Majlisi delegatsiyasi Ozarbayjon Respublikasi Konstitutsiyasi qabul qilinganligining 30 yilligi munosabati bilan “Zamonaviy dunyoda Konstitutsiya davlatlar mustaqilligi va suverenitetining asosi sifatida” mavzusida Boku shahrida joriy yilning 29-oktyabr kuni boʻlib oʻtgan xalqaro parlament konferensiyasida ishtirok etdi.

Anjumanda Ozarbayjon, Birlashgan Arab Amirliklari, Pokiston, Ruminiya, Tojikistonning parlamentlari rahbarlari, bir qator davlatlar parlamentlarining aʼzolari va xalqaro tashkilotlar vakillari ham qatnashdi.

Oʻzbekiston Oliy Majlisi delegatsiyasi rahbari oʻz maʼruzasida Ozarbayjon xalqini Konstitutsiya qabul qilinganining 30 yilligi bilan samimiy tabriklab, har bir davlatning Asosiy qomusi – bu xalq irodasi, milliy gʻurur va mustaqillik ramzi ekanligini alohida taʼkidlab oʻtdi. Shuningdek, Oʻzbekiston va Ozarbayjon oʻrtasida barcha sohalarda oʻzaro yaqin va doʻstona munosabatlar, shu jumladan, parlamentlararo hamkorlik izchil rivojlanayotgani qayd etildi.