Oʻzbekiston milliy terma jamoasi bosh murabbiyi Srechko Katanes oʻz lavozimidan isteʼfoga chiqdi. Bu haqda Oʻzbekiston futbol assotsiatsiyasi (OʻFA) matbuot xizmati xabar berdi. Sloveniyalik murabbiy sogʻligʻi bilan bogʻliq muammolar tufayli terma jamoani boshqarishdagi vazifalarini toʻlaqonli bajara olmasligini bildirib, shartnomani oʻzaro rozilik asosida bekor qilishga qaror qildi.

Srechko Katanes oʻz murojaatida hozirgi holatida professional darajada ishlash imkoniyati yoʻqligini afsus bilan taʼkidladi. Shuningdek, u OʻFAga qoʻllab-quvvatlagani va samarali hamkorlik uchun oʻz minnatdorchiligini izhor etdi hamda milliy terma jamoaga Jahon chempionati saralash bahslarida omad tiladi.

Oʻzbekiston futbol assotsiatsiyasi Srechko Katanesning Oʻzbekiston terma jamoasini boshqarishdagi xizmatlarini yuqori baholab, uning sogʻligʻini tiklash va murabbiylik faoliyatini muvaffaqiyatli davom ettirishini tiladi. Assotsiatsiya va murabbiy oʻrtasidagi shartnoma doʻstona munosabatlar saqlangan holda bekor qilingani taʼkidlandi.

Hozirda OʻFA milliy terma jamoaning bosh murabbiyi lavozimiga munosib nomzodni tanlash boʻyicha ishlarni olib bormoqda. Yaqin kunlarda yangi murabbiy tayinlanishi kutilmoqda.

Qayd etish kerakki, Srechko Katanes 2021-yilda Oʻzbekiston milliy terma jamoasi bosh murabbiyi etib tayinlangan edi. Uning davrida jamoa Osiyo Kubogi va Jahon chempionati saralash bahslarida qatnashdi.