Arxiv surat

Germaniya Oʻzbekiston bilan afgʻonlarning deportatsiyasiga koʻmaklashish uchun migratsiya kelishuvini koʻrib chiqmoqda. Reja Germaniyadan boshpana olish huquqiga ega boʻlmagan afgʻon qochqinlari muammosini hal qilishga qaratilgan. Bu haqda «Bloomberg» nashri xabar bermoqda.

Oʻzbekiston bilan muzokaralarga Germaniya ichki ishlar vaziri Nensi Fazer boshchilik qilmoqda. Shartnoma Germaniyaga ayrim afgʻon qochqinlarini toʻgʻridan-toʻgʻri Afgʻonistonga deportatsiya qilish oʻrniga Oʻzbekistonga yuborish imkonini beradi. Bu harakat afgʻon qochqinlari oqimidan kelib chiqadigan muammolarni hal qilish yoʻli sifatida koʻrilyapti.

Germaniyaning oyiga ming nafar xavf ostidagi afgʻonlarni qabul qilish boʻyicha yangi dasturi amalda qolmoqda. Shunga qaramasdan, afgʻon qochqinlarining hammasi ham ushbu dasturga mos kelavermaydi, bu esa muqobil yechimlarga ehtiyoj tugʻdiradi. Oʻzbekiston bilan taklif etilayotgan shartnoma ham ana shu keng koʻlamli saʼy-harakatlarning bir qismi.

Berlin qochqinlar dasturini amalga oshirish uchun koʻplab hamkorlar bilan muzokaralar olib bormoqda. Germaniya 2021-yil avgustida «Tolibon» harakati Afgʻonistonni egallab olganidan beri afgʻonlarga boshpana berishda faol ishtirok etib kelmoqda.