Foto: “Dunyo”

Oʻzbekistonning yangi elchisi Nodir Gʻaniyev kecha Fransiya Prezidenti Emmanuel Makronga ishonch yorliqlarini topshirdi. Bu haqda “Dunyo” AA xabar bermoqda.

Manbaga koʻra, rasmiy marosim doirasida boʻlib oʻtgan suhbatda Fransiya Prezidenti Emmanuel Makron Toshkent va Parij oʻrtasidagi ikki tomonlama munosabatlar holati va istiqbolini yuqori baholagan.

Shuningdek, u 2023-yil noyabr oyida Samarqandga boʻlgan rasmiy tashrifini iliq taassurotlar bilan eslab, oliy darajadagi siyosiy muloqotni davom ettirish va Oʻzbekiston bilan doʻstlik aloqalarini yanada rivojlantirish tarafdori ekanligini taʼkidlagan.

Tadbir davomida Fransiya yetakchisiga Oʻzbekiston elchisi bilan bir qatorda yana 20 ta xorijiy mamlakatlarning elchilari oʻz ishonch yorliqlarini topshirgan.

Makron elchilarni ushbu lavozimga kirishishlari bilan tabriklab, ularga ikki tomonlama hamkorlikni rivojlantirish borasidagi diplomatik faoliyatlarida ulkan zafarlar tilagan.

Maʼlumot uchun, Nodir Gʻaniyev 13-iyul kuni Parij shahriga Oʻzbekistonning yangi elchisi sifatida yetib kelgandi. U shu kunga qadar Oʻzbekistonning Shvetsiyadagi birinchi Favqulodda va Muxtor Elchisi lavozimida ishlagan.

Undan avval esa TIVning Yevropa mamlakatlari va Yevropa Ittifoqi institutlari bilan hamkorlik boshqarmasiga rahbarlik qilgan.