Shu yilning 17-aprel kuni velosport olamidagi eng yirik musobaqalardan biri oʻtkaziladi. Fransiya shimolidan yoʻnalish olgan “Parij-Rube” nomli ushbu poygada qatnashish va sovrindor boʻlish koʻplab velosportchilarning orzusi hisoblanadi.

Mazkur turnir bu yil 119-bor tashkil etiladi. Unda Oʻzbekiston terma jamoasi aʼzosi, hozirda “Roland Cogeas Edelweiss” klubi safida harakat qilayotgan Olga Zabelinskaya jahon yulduzlari bilan bir safda gʻoliblik uchun kurashadi. Taʼkidlash joiz, Olga dunyoning eng kuchli poygachilari bellashadigan “WorldTour” jamoalari bilan shartnomaga ega boʻlgan yagona sportchimizdir.

Mazkur poyga velosport olamida biroz qoʻpol yangrasa ham, “Shimoliy jahannam” nomini olgan. Boisi unda sportchilar ming bir mashaqqat bilan uzoq masofadagi yoʻlni bosib oʻtishadi. Bu yilgi poyga masofasi 257,2 kilometr qilib belgilangan. 

Bu pelaton taxminan 6 soat davomida tinimsiz harakat qilishini anglatadi. Yoʻnalishning 55 km qismi “pave seksiyasi”, yaʼni “tosh yoʻlakli sektor”ni tashkil qiladi. Umuman, poyga davomida sportchilar murakkabligi 1 dan 5 yulduzgacha boʻlgan turli masofalarni bosib oʻtishadi. 

“Tosh yoʻlakli sektori”da ishtirokchilarni turli qalinlik va shakldagi mayda toshlar va boshqa bir qator sarguzashtlar kutib turibdi. Har qalay bunday yoʻlda velosipedlarga texnik shikast yetishi ehtimoli yuqori.