Toʻy — hayot abadiyligining tantanasi. Unda yangi oila yoxud bir xonadonda oʻgʻlon voyaga yetayotganligi mahalla-koʻy, qavmu qarindoshlarga maʼlum qilinadi. Ushbu udum orqali mehr-oqibat rishtalari ham mustahkamlanib, birdamlik taʼminlanadi. Albatta, bu tadbirga qoʻli kaltalik qilayotgan oilalar ham yoʻq emas.

Shu bois mamlakatimizda aholining ijtimoiy himoyaga muhtoj qatlamlarini moddiy va maʼnaviy qoʻllab-quvvatlash, jamiyatda oʻzaro hamjihatlik va xayr-saxovat muhitini yanada mustahkamlash maqsadida sunnat toʻylarini oʻtkazishda xayrli tadbirlarga qoʻl urilmoqda.

Nurotalik tadbirkor(ism-sharifini aytmaslikni iltimos qildi) shulardan biri boʻlib, u ijtimoiy himoyaga muhtoj, kam taʼminlangan hamda nogironligi boʻlgan oilalarning 52 nafar bolajonlari uchun sunnat toʻyi dasturxonini yozdi.

— Farzandim Salimjonning sunnat toʻyiga tashrif buyurgan yaqin qarindoshlarimiz bunday saxovat uchun tashkilotchilarga oʻz minnatdorligini bildirishmoqda, — deydi uning onasi Sohiba Jumayeva. — Bu mamlakatimizda hech bir bola mehr-eʼtibordan chetda emasligining amaliy ifodasidir. Albatta, har bir savobli ish ertaga ular uchun qanot boʻlishiga ishonamiz.

Tadbir doirasida “toʻy bola”larga sovgʻalar ulashildi. Taniqli sanʼatkorlar ijrosidagi kuy-qoʻshiqlar davraga fayz kiritdi.

Temur ESHBOYEV

“Xalq soʻzi”.