Jahon shaxmat federatsiyasi dekabr oyining yakunlari boʻyicha oʻz reytingini yangiladi. Mazkur reytingda oʻzbekistonlik shaxmatchilarning muvaffaqiyati yana bir bor eʼtirof etildi. Qayd etish kerakki, kuchli 100 talikdan 5 nafar grossmeysterimiz joy oldi. Ushbu muvaffaqiyat oʻzbek shaxmatining xalqaro miqyosda oʻsib borayotgan nufuzini koʻrsatmoqda.

Yangilangan reytingda Nodirbek Abdusattorov reyting ochkolari 9 punktga kamaygan boʻlsa-da, 2768 ochko bilan 6-oʻrinni saqlab qoldi. Shu bilan birga, Nodirbek yoshlar oʻrtasidagi reytingdan chiqarilgan, chunki u bu yil 21 yoshga toʻladi va kattalar reytingida qatnashmoqda.

Javohir Sindorov (2692) oʻz oʻrnini yaxshilab, 37-pogʻonaga koʻtarildi. Avvalgi oyda 46-oʻrinda boʻlgan Sindorov bu oyda 9 pogʻona yuqoriladi. Tajribali grossmeyster Rustam Qosimjonov (2683) esa 45-oʻrinda joylashgan.

Shamsiddin Vohidov (2670) bu oyda 52-oʻringa chiqdi, avvalgi oyda u 62-oʻrinda qayd etilgan edi. Nodirbek Yakubboyev (2659) esa 67-oʻringa tushib ketdi, u avvalgi oyda 62-oʻrinda edi. Reytingdagi bu oʻzgarishlar shaxmatchilarimizning tinimsiz kurash olib borayotganini koʻrsatadi.

Yoshlar reytingida esa oʻzbekistonliklar muvaffaqiyatlari davom etmoqda. Javohir Sindorov kuchli uchlikdan joy olgan boʻlsa, Muxriddin Madaminov 31-oʻrinda va Muhammadzoxid Suyarov 68-oʻrinda joylashgan. Oʻzbekistonlik yosh shaxmatchilarning bu natijalari kelajakda yanada yuksak marralarni zabt etishga tayyor ekanliklaridan dalolatdir.

Shuni alohida aytish mumkinki, 2024-yilda Muxriddin Madaminov va Ortiq Nigmatovlar grossmeyster unvoniga sazovor boʻldi.