Foto: Xalq so‘zi

Yurtimizda “millionlar oʻyini”ga ishqibozlikda namanganliklarning oldiga tushadigan yoʻq hisobi. Oʻzining sevimli jamoasiga sadoqatini har bir uchrashuvda stadionni toʻldirish bilan isbotlaydigan bu insonlar safar oʻyinlarini ham qoldirishmaydi. Ularning qoʻllab-quvvatlashi esa “Navbahor”chilarga alohida kuch-gʻayrat bagʻishlashi amalda isbotini topgan.

Masalaning ayni jihatini eʼtiborda tutgan Namangan viloyat hokimligi muxlislarga atab munosib tuhfa tayyorladi. Gap shundaki, jamoaning “Nasaf” bilan joriy yil 30-oktyabr kuni oʻtkaziladigan bahsi uchun Buxorodagi “Markaziy” stadioni belgilangan. Masofa anchagina uzoq va transport masalasi ham oson emas. Endi bu muammoga oʻrin qolmadi. “Namangan-Buxoro-Namangan” yoʻnalishi boʻyicha bir martalik poyezd qatnovi yoʻlga qoʻyiladigan boʻldi.

Poyezd muxlislarni Namangan shohbekatidan olib ketadi va oʻyin yakunlanganidan soʻng ortga olib qaytadi. Buxoroga borish istagidagi ishqibozlar safi hozirdanoq toʻlib bormoqda. Binobarin, Oʻzbekiston kubogi finali har qachongidan murosasiz va betakror oʻtishiga shubha qilmasa ham boʻladi.

Qudratilla NAJMIDDINOV,  “Xalq soʻzi”.