Qudratilla NAJMIDDINOV/“Xalq soʻzi”. Gullar shahri navbatdagi yirik tadbirga mezbonlik qiladigan boʻldi. Yangi yoʻnalishdagi anjuman – I Xalqaro Namangan avtofestivali joriy yilning 22-fevralida tashkil etiladi. Viloyat hokimligining ushbu tashabbusi orqali yosh texnik va avto havaskorlarni qoʻllab-quvvatlash, avtomobil tyuningi sanoatini rivojlantirish, ixlosmandlar uchun yangi imkoniyatlar yaratish hamda avtoturizm sohasiga yangidan-yangi loyihalarni olib kirish maqsad qilingan.

Tashkilotchilar festivalni betakror mazmun va mundarijaga boy holda oʻtkazish dasturini ishlab chiqishdi. Unga koʻra, anjuman avvalida retro avtomobillar koʻrgazmasi uyushtirilib, tarixiy mashinalar jozibasi namoyish qilinadi. “Tyuning” avtomobillari musobaqasida esa ishtirokchilar eng kreativ va shiddatli avtomobillar bilan yaqindan tanishadi. Avto hunarmandlar musobaqasi eng mohir ustalarning chinakam bellashuviga aylanadi.

Anjuman doirasida shahar boʻylab avtoparad, avtoauksion va ehtiyot qismlar yarmarkasi, karting musobaqalari hamda qimmatbaho sport avtomobillari namoyishi ham koʻzda tutilgan.

Xalqaro festivalning asosiy tadbirlarini Davlatobod tumanidagi “Afsonalar vodiysi” tematik parkida oʻtkazish rejalashtirilgan. Shu kunlari tashkil etiladigan alohida konsert dasturlari va shou tomoshalar ham ishtirokchilarga maroqli lahzalarni taqdim etishi kutilmoqda.