Foto: Bosh prokuratura huzuridagi Departament

Bosh prokuratura huzuridagi Departament Namangan viloyatida yer maydonlarini sotmoqchi boʻlgan shaxslarni fosh etdi. Bu haqda Departamentning matbuot xizmati xabar berdi.

Maʼlum boʻlishicha, Bosh prokuratura huzuridagi Departamentning Toʻraqoʻrgʻon tumani boʻlimi va DXX xodimlari hamkorligida oʻtkazilgan tezkor tadbirda fuqaro I.M.ning qilmishlari oydinlashadi.

Qayd etilishicha, u turmush oʻrtogʻi Yu.N.ning nomiga auksion orqali xarid qilgan “Obod namuna diyori” massivida joylashgan 1 gektar yer maydonini fuqaro Sh.X.ga firibgarlik yoʻli bilan 10 ming AQSH dollariga sotishga kelishib, uning nomiga hujjatlarini rasmiylashtirib berishini aytib, kelishilgan pullar hisobidan 6 ming 900 AQSH dollari va 15 million soʻmni olgan vaqtida ashyoviy dalillar bilan ushlangan.

Yana bir holat Departamentning Uchqoʻrgʻon tumani boʻlimi va DXX xodimlari hamkorligida oʻtkazilgan tezkor tadbirda maʼlum boʻlgan. Qayd etilishicha, “Q.S.” MCHJning Uchqoʻrgʻon filiali rahbari M.A. MCHJga qarashli 8 sotix yer maydonini fuqaro G.B.ga goʻyoki yuqori lavozimda ishlovchi tanishlari yordamida uning nomiga kadastr hujjatlarini tayyorlatib sotishini vaʼda qilib, evaziga 5 ming 500 AQSH dollarini firibgarlik yoʻli bilan olgan vaqtida qoʻlga olingan.

“Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.

Avvalroq, Oʻzbekiston shaxmat terma jamoasi bugun Trinidad va Tobago hamda Haitiga qarshi dona surishi haqida xabar bergandik.