Foto: Reuters

Argentina terma jamoasi va AQSHning “Inter Mayami” klubi hujumchisi Lionel Messi 2026-yilgi jahon chempionatida terma jamoa tarkibida oʻynashni xohlashini tan oldi.

“Aytganimdek, bor eʼtiborimni hozirgi kunga qaratganman, lekin jahon chempionati haqida oʻylamaganman desam, yolgʻon gapirgan boʻlaman. Ha, men u haqida oʻylayman. Bu yil mening kelajagim haqida qaror qabul qilishda asosiy boʻladi. Men toʻgʻri ritmni, izchillikni topmoqchiman”, — deydi futbolchi.

2026-yilgi jahon chempionati kelasi yozda AQSH, Meksika va Kanadada boʻlib oʻtadi. Final uchrashuvi 19-iyulga belgilangan.

Messi Ispaniyaning “Barselona” klubi tarbiyalanuvchi hisoblanadi. U 2003-yildan 2021-yilgacha ushbu jamoa sharafini himoya qilgan. Shu davr mobaynida 835 oʻyin oʻtkazib, raqiblar darvozasiga 709 ta gol urgan.

Messi “Barselona” bilan toʻrt marta Chempionlar ligasida gʻolib chiqqan. Argentina terma jamoasi bilan 2022-yilgi jahon chempionatida bosh sovrinni qoʻlga kiritgan, ikki marta Amerika kubogida gʻalaba qozongan. U sakkiz marta “Oltin toʻp”ga loyiq koʻrilgan.