Foto: Eron prezidenti maʼmuriyati

Eron prezidenti Masʼud Pezeshkiyon mamlakat AQSh va Isroil bombardimon qilgan yadroviy inshootlarni qayta tiklashini maʼlum qildi. Bu haqda prezident maʼmuriyatining rasmiy Telegram kanalida xabar berildi.

Pezeshkiyonning taʼkidlashicha, Eronning ilmiy salohiyati binolarda emas, olimlar ongida mujassam, shu bois inshootlarni yoʻq qilish Tehron uchun jiddiy muammo tugʻdirmaydi.

“AQSh binolarni vayron qilishi mumkin, ammo biz ularni yanada qudratliroq kuch bilan qayta tiklaymiz”, degan u.

Maʼlumot uchun, joriy yilning 13-iyun kuni tunda Isroil yashirin yadroviy dastur olib borishda ayblab, Eronga qarshi harbiy amaliyot boshladi. Hujumlar atom obyektlari, harbiy bazalar va yadro fiziklari faoliyat koʻrsatayotgan markazlarga yoʻnaltirildi.

Eron esa bu ayblovlarni rad etib, javob zarbalarini amalga oshirdi. Tomonlar oʻrtasidagi qarama-qarshilik 12 kun davom etdi va bu jarayonga keyinchalik AQSh ham qoʻshildi. Vashington 22-iyun kuni Eron yadroviy obyektlariga havodan hujum uyushtirdi.

Bunga javoban, Eron 23-iyun kuni Qatardagi El-Udeyd aviabazasiga raketa zarbasi berdi, biroq shundan soʻng mamlakat “jangovar harakatlarni kuchaytirish niyati yoʻqligini” maʼlum qildi.