Foto: Akmal Muhammadov / “Xalq so‘zi”

Bugun Samarqand sayyohlik markazida joylashgan Kongress hollda “Madaniy merosni saqlashda kinoning o‘rni” mavzusida Anjuman bo‘lib o‘tdi. Uning doirasida bir qator madaniy loyihalarning taqdimoti o‘tkazildi.

Anjumanga Milliy kinematografiyani rivojlantirish markazi direktori Furqat Usmonov moderatorlik qildi. Kunning birinchi qismida ishtirokchilar uchun Islom sivilizatsiyasi markazi multimedia bloki uchun tayyorlangan “Arab tili evolyutsiyasi”, “Masjid”, “Sehrli ko‘za”, “Baqtriya tarixi”, “Klavixo”, “Xudoybergan Devonov va nemis mennonitlari” “Muxtor Avezov” videoroliklar turkumi loyihalari, shuningdek “O‘zbekiston madaniy merosi” turkumiga oid hujjatli filmlar taqdimotlari o‘tkazildi.

Kunning ikkinchi qismida TURKSOY forumining asosiy OAV faoliyatiga bag‘ishlangan ma’ruzalari tinglandi. Uning doirasida turkiy tilli davlatlar o‘rtasidagi madaniy aloqalarni mustahkamlashda OAVning o‘rni, bundan tashqari OAVning madaniy merosga o‘zaro ta’siri, kontentni birgalikda ishlab chiqarishning qiyinchililari va imkoniyatlari, turizm va milliy brendingni rivojlantirishda OAVning roli, turkey dunyo mamlakatlari kino va OAV uchun yagona platforma yaratish masalalari kabi mavzular muhokama qilindi.

Kun yakunida turkiy dunyo davlatlarining yagona kino-media platformasini yaratish to‘g‘risidagi memorandum imzolandi hamda TURKSOY forumining “Yangi uyg‘onish davri: kino va OAV madaniy merosni qo‘llab-quvvatlash yo‘lida” rezolyutsiyasi qabul qilindi va yig‘ilish bayonnomasi tuzildi.   

Ma’lumot uchun TURKSOY xalqaro forumi “Buyuk ajdodlar merosi – Uchinchi Renessans poydevori” VIII xalqaro kongress doirasida o‘tkazildi.

Kongress Madaniyat vazirligi huzuridagi Kinematografiya agentligi, Vazirlar Mahkamasi huzuridagi Islom sivilizatsiya markazi hamda O‘zbekiston madaniy merosini o‘rganish, saqlash va ommalashtirish bo'yicha Butunjahon jamiyati hamkorligida tashkil etildi.

Foto: Akmal Muhammadov / “Xalq so‘zi”