Фото: Акмал Муҳаммадов / “Халқ сўзи”

Самарқанд сайёҳлик марказида жойлашган Конгресс ҳоллда “Маданий меросни сақлашда кинонинг ўрни” мавзусида Анжуман бўлиб ўтди. Унинг доирасида бир қатор маданий лойиҳаларнинг тақдимоти ўтказилди.

Анжуманга Миллий кинематографияни ривожлантириш маркази директори Фурқат Усмонов модераторлик қилди. Куннинг биринчи қисмида иштирокчилар учун Ислом сивилизацияси маркази мултимедиа блоки учун тайёрланган “Араб тили эволюцияси”, “Масжид”, “Сеҳрли кўза”, “Бақтрия тарихи”, “Клавихо”, “Худойберган Девонов ва немис меннонитлари” “Мухтор Авезов” видеороликлар туркуми лойиҳалари, шунингдек “Ўзбекистон маданий мероси” туркумига оид ҳужжатли филмлар тақдимотлари ўтказилди.

Куннинг иккинчи қисмида ТУРКСОЙ форумининг асосий ОАВ фаолиятига бағишланган маърузалари тингланди. Унинг доирасида туркий тилли давлатлар ўртасидаги маданий алоқаларни мустаҳкамлашда ОАВнинг ўрни, бундан ташқари ОАВнинг маданий меросга ўзаро таъсири, контентни биргаликда ишлаб чиқаришнинг қийинчилилари ва имкониятлари, туризм ва миллий брендингни ривожлантиришда ОАВнинг роли, туркей дунё мамлакатлари кино ва ОАВ учун ягона платформа яратиш масалалари каби мавзулар муҳокама қилинди.

Кун якунида туркий дунё давлатларининг ягона кино-медиа платформасини яратиш тўғрисидаги меморандум имзоланди ҳамда ТУРКСОЙ форумининг “Янги уйғониш даври: кино ва ОАВ маданий меросни қўллаб-қувватлаш йўлида” резолюцияси қабул қилинди ва йиғилиш баённомаси тузилди.  

Маълумот учун ТУРКСОЙ халқаро форуми “Буюк аждодлар мероси – Учинчи Ренессанс пойдевори” VIII халқаро конгресс доирасида ўтказилди.

Конгресс Маданият вазирлиги ҳузуридаги Кинематография агентлиги, Вазирлар Маҳкамаси ҳузуридаги Ислом сивилизация маркази ҳамда Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти ҳамкорлигида ташкил этилди.

Фото: Акмал Муҳаммадов / “Халқ сўзи”