“Kirk” toʻfoni Gʻarbiy Yevropada bir qancha noqulayliklarni yuzaga keltirmoqda. Xususan kuchli yomgʻir tufayli daryolar sathi koʻtarilgan.

Parij atrofidagi shaharlar suv ostida qoldi. Aholi koʻchalarda tizzagacha suvda yurishmoqda. Magistral yoʻllar va shahar yoʻllari suv ostida. Avtomobillar harakatlana olmayapti. Er va Luar hamda Sena va Marna departamentlarida qizil ogohlantirish darajasi eʼlon qilindi. Koʻpgina maktablar yopilgan. Er va Luar departamentida 860 ta qutqaruv operatsiyasi oʻtkazildi. Sena va Marna departamentida chorshanba kunidan beri 180 kishi evakuatsiya qilingan.

Fransiyada noqulay ob-havo tufayli 12 kishi jabrlandi. Bu haqda mamlakat IIV xabar berdi.

“Kirk” tropik boʻroni 30-sentyabr kuni Atlantika okeanining markaziy qismida, Kabo-Verde janubi-gʻarbida vujudga kelgan. Toʻfon Fransiyaga “tropik depressiya” sifatida yetib keldi. Respublikada 9-oktyabr eng yomgʻirli kun boʻldi. Yomgʻirlar milliy assambleyani (Fransiya parlamentining quyi palatasi) suv ostida qoldirdi. 64 mingdan ortiq odam elektr energiyasiz qoldi.