Kanada va Avstraliya hukumatlari Falastin davlatini tan olgani toʻgʻrisidagi bayonotini eʼlon qildi.

Mazkur bayonotda aytilishicha, hozirgi Isroil hukumati Falastin davlatining tashkil etilishiga yoʻl qoʻymaslik uchun tizimli ravishda ish olib bormoqda. Hukumat xalqaro huquqqa zid ravishda Gʻarbiy Sohilda aholi punktlarini kengaytirish boʻyicha toʻxtovsiz siyosat olib bormoqda. Isroil hukumatining Gʻazo hududidagi davomli harbiy operatsiyalari minglab tinch aholining oʻlimiga sabab boʻlgan. Bundan tashqari, bir milliondan ortiq mahalliy aholi vakillari boshqa hududlarga koʻchishga majbur boʻlgan. Shuningdek, Isroil hukumatining tizimli hujumlari xalqaro huquqni buzgan holda halokatli ocharchilikka ham sabab boʻlgan.

“Shunday vaziyatda Kanada Falastin davlatini tan oladi. Hukumatimiz Falastin hamda Isroil davlatlari uchun tinch kelajak yaratishda hamkorlik taklif qiladi. Kanada buni ikki davlat yechimi imkoniyatini saqlab qolish boʻyicha muvofiqlashtirilgan xalqaro saʼy-harakatlarning bir qismi sifatida amalga oshirmoqda. Bu eʼtirof Birlashgan Millatlar Tashkiloti Nizomida aks ettirilgan oʻz taqdirini oʻzi belgilash va inson huquqlari tamoyillariga va Kanadaning avlodlar uchun izchil siyosatiga qatʼiy mos keladi”, — deyiladi hukumat bayonotida.

Shuningdek, Avstraliya hukumati ham Falastin davlatini tan olgani toʻgʻrisida bayonot eʼlon qildi.

Ushbu bayonotda 2025-yilning 21-sentyabr kunidan boshlab, Avstraliya Falastinni mustaqil va suveren davlat sifatida rasman tan olishi belgilangan.

“Avstraliyaning Kanada va Buyuk Britaniya bilan bir qatorda Falastinni tan olishi Gʻazoda oʻt ochishni toʻxtatish va 2023-yil 7-oktyabrdagi vahshiyliklarda garovga olinganlarni ozod qilishdan boshlab, ikki davlat yechimi uchun yangi surʼat yaratish boʻyicha muvofiqlashtirilgan xalqaro saʼy-harakatlarning bir qismidir. Bugungi eʼtirof akti Avstraliya va Falastin xalqlari uchun doimo tinchlik va xavfsizlikni taʼminlashning yagona yoʻli boʻlgan ikki davlat yechimiga uzoq yillik sadoqatini aks ettiradi”, — deyiladi bayonotda.

Shuningdek, eʼlon qilingan bayonotda Avstraliya hukumati xalqaro hamkorlar bilan bugungi eʼtirof aktini mustahkamlash va Yaqin Sharqni mustahkam tinchlik va xavfsizlikka yaqinlashtirishga yordam berish uchun ishlashda davom etishi qoʻshimcha qilingan.