Sogʻliqni saqlash vazirligi 11 oy ichida shoshilinch tibbiy yordamga murojaat qilganlarning atigi 9 foizi kasalxonaga yotqizilganini, qolgan 91 foizi esa jiddiy yordam talab qilmasligini aytdi.

Maʼlumotlarga koʻra, 11 oy davomida aholi tomonidan tez tibbiy yordam xizmatiga jami murojaatlar soni 11 604 292 tani tashkil etgan. Bu 2020-yilning shu davriga nisbatan qariyb 1 millionga koʻpdir. Eng koʻp qoʻngʻiroqlar soni quyidagi viloyatlarga toʻgʻri keladi:

Fargʻona viloyati — 1 373 997;

Andijon viloyati — 1 288 543;

Toshkent viloyati — 1 147 892;

Toshkent — 1 146 005.

Yil boshidan 1-dekabrgacha tez tibbiy yordam xizmati orqali 11 422 063 nafar bemorga birinchi tibbiy yordam koʻrsatildi. Ulardan faqat 1 049 221 kishi kasalxonaga yotqizilgan. Kasalxonaga yotqizish darajasi 9% ni tashkil etdi. Yaʼni, 90% dan ortigʻida bemorlarga tibbiy yordam joyida koʻrsatiladi. Bu shuni anglatadiki, tez yordam chaqiradigan koʻpchilik odamlar yordamga muhtoj emas.

Shuningdek, vazirlik har bir asossiz chaqiriq uchun davlat hisobidan maʼlum xarajatlar sarflanayotganini taʼkidladi.

Bu xalqning, yaʼni siz va biz, hammamizning pulimiz. Qolaversa, tibbiyot xodimlarining ham vaqti behuda ketmoqda. Eng yomon holatda, boshqa bemorlarni shoshilinch tibbiy yordam bilan qamrab olish kamayadi, deyiladi vazirlik bayonotida.