Foto: “Xalq soʻzi”

Izboskan tumanidagi “And gold” MCHJda yilning shu davriga qadar 5400 tonna mahsulot ishlab chiqarishga erishildi. Eʼtiborli jihati shundaki, mahsulot 100 foiz xorijga eksport qilinmoqda.

— Korxonamizda paxta xom ashyosidan kalava ip tayyorlash, toʻqilgan tekstil matosidan bolalar, ayollar va erkaklar uchun kiyim-kechak ishlab chiqarish yoʻlga qoʻyilgan, — deydi korxona rahbari Farhodbek Toshmatov. — Eʼtiborli jihati, mahsulot 5 ta xorijiy davlatga eksport qilinmoqda. Hozirda jamoamizda 1000 nafar ishchilar mehnat qilyapti. Tez kunlarda Asaka tumanida qiymati 10 mln. dollar boʻlgan yangi loyihani ishga tushirish natijasida ishchilar soni va mahsulot hajmini oshirish imkoniyati yaratiladi.

Shu oʻrinda aytish joizki, Andijon viloyatida tadbirkorlikni qoʻllab-quvvatlashga boʻlgan eʼtibor har doimgidan ortgan. Bu esa yilning oʻtgan davri mobaynida 2378 ta yangi subyektlarning tashkil etilishiga sabab boʻldi. Natijada hududda mahsulot ishlab chiqarish hajmi 28,8 trillion soʻmni tashkil etdi.

Saminjon HUSANOV, “Xalq soʻzi”.