Islandiyada aholini “AstraZeneca” (Buyuk Britaniya/Shvetsiya) kompaniyasi tomonidan ishlab chiqarilgan koronavirusga qarshi vaksina bilan emlash tadbirlari toʻxtatildi.

Bu haqda mahalliy sogʻliqni saqlash idorasi xabar bermoqda.

Izohlanishicha, ushbu qaror emlangan fuqarolarda tromblarning shakllanishi, shuningdek, Daniyada vaksina bilan bogʻliq boʻlishi mumkin boʻlgan oʻlim holati haqida maʼlumot paydo boʻlganidan keyin qabul qilindi. Hozircha, Islandiyada bunday holatlar qayd etilmagan.

Maʼlumki, bungacha “AstraZeneca” vaksinasi bilan emlash Daniya, Italiya va Norvegiyada toʻxtatilgan edi.

Ammo hozirgacha vaksina va tromblar shakllanishi oʻrtasidagi bogʻliqlik toʻgʻrisida aniq xulosa qilinmagan.

Avstriyada “AstraZeneca” vaksinasi bilan emlangan 49 yoshli ayol qon aylanish tizimining ogʻir buzilishi natijasida vafot etgani, yana bir ayolda qon aylanish tizimida buzilish holati kuzatilgani haqida xabarlar tarqalgan edi.

Oldinroq, Oʻzbekiston YUNISEF taqdim etgan jadvalga asosan 2 mln 640 ming doza “AstraZeneca/Oxford” vaksinasini olishi va uning bir dozasi narxi taxminan 3 dollarni tashkil etishi haqida xabar bergan edik.