Исландияда аҳолини "AstraZeneca" (Буюк Британия/Швеция) компанияси томонидан ишлаб чиқарилган коронавирусга қарши вакцина билан эмлаш тадбирлари тўхтатилди.

Бу ҳақда маҳаллий соғлиқни сақлаш идораси хабар бермоқда.

Изоҳланишича, ушбу қарор эмланган фуқароларда тромбларнинг шаклланиши, шунингдек, Данияда вакцина билан боғлиқ бўлиши мумкин бўлган ўлим ҳолати ҳақида маълумот пайдо бўлганидан кейин қабул қилинди. Ҳозирча, Исландияда бундай ҳолатлар қайд этилмаган.

Маълумки, бунгача "AstraZeneca" вакцинаси билан эмлаш Дания, Италия ва Норвегияда тўхтатилган эди.

Аммо ҳозиргача вакцина ва тромблар шаклланиши ўртасидаги боғлиқлик тўғрисида аниқ хулоса қилинмаган.

Австрияда "AstraZeneca" вакцинаси билан эмланган 49 ёшли аёл қон айланиш тизимининг оғир бузилиши натижасида вафот этгани, яна бир аёлда қон айланиш тизимида бузилиш ҳолати кузатилгани ҳақида хабарлар тарқалган эди.

Олдинроқ, Ўзбекистон ЮНИСЕФ тақдим этган жадвалга асосан 2 млн 640 минг доза "AstraZeneca/Oxford" вакцинасини олиши ва унинг бир дозаси нархи тахминан 3 долларни ташкил этиши ҳақида хабар берган эдик.