"InnoWeek.Uz-2021" haftalik tadbirlarida 380 ta tashkilot va korxonalardan jami 14,5 ming nafar ishtirokchilar qatnashdi (ularning 7,1 ming nafari onlayn tarzda), shu jumladan, 18 ta mamlakatdan 131 nafar xorijlik mehmonlar tashrif buyurdi.

Haftalik "Pandemiyadan keyingi davr uchun innovatsiyalar: yashil texnologiyalar, sunʼiy intellekt, texnologik inqilob, startap ekotizimi" shiori ostida ish boshladi hamda uning doirasida oʻndan ortiq tadbirlar va konferensiyalar tashkil etildi.

Xususan, "Postpandemiya davri uchun innovatsiyalar va investitsiyalar forumi", "Sunʼiy intellekt – texnologik rivojlanish asosi", "Vodorod texnologiyalari, qayta tiklanuvchi energiya manbalari va energiya tejamkorlik sohasida ilmiy tadqiqotlarni rivojlantirish" hamda "Tadqiqotlarni tijoratlashtirish va texnologiya transferining innovatsion strategiyalari" boʻyicha dolzarb mavzular muhokama etilib, ularga yechim topish yuzasidan harakatlar strategiyasi koʻrib chiqildi.

Haftalik davomida TechnoWays texnologik rivojlanish marafoni va "Innovatsion gʻoyalar yetakchisi" koʻkrak nishoni gʻoliblari ham taqdirlandi. Shuningdek, Xalqaro robototexnika musobaqasi va 5-Turkiy dunyo bolalarining fan va madaniyat festivali ham oʻtkazildi.

Shu bilan birga, ilmiy faoliyatga oid davlat dasturlari doirasida eʼlon qilingan loyihalar tanlovlari gʻoliblarini taqdirlash marosimi boʻlib oʻtdi. Vazirlik tomonidan eʼlon qilingan "Startap loyihalar tanlovi" gʻoliblariga grant mablagʻlari topshirildi. "Eng yaxshi innovatsion mahsulotlari" tanlovi doirasida koʻrgazma ishtirokchilarining eng yaxshi startap loyihalari taqdirlandi.