Foto: “Xalq soʻzi”

Nukus shahrining 6 ta manzilida joriy o‘quv yili uchun oliy ta'lim muassasalariga kirish imtihonlari boshlandi.

— Test imtihonlarining mana shunday shaffof o‘tkazilishi va ota-onalar uchun testni onlayn kuzatish imkoniyatini yaratilgani bizni juda quvontirdi, — deydi chimboylik Fotima Qutlimuratova. — To‘g‘risi, ilgari oftobda sarg‘ayib, tik oyoqda kutib turar edik. Bugun nafaqat abiturientlar balki, ota-onalar uchun ham alohida xona va maxsus jihozlangan kutish zallari ajratilganidan mamnun bo‘ldik.

Test o‘tkazilayotgan Nukus davlat pedagogika instituti vakillaridan iborat volontyorlar guruhi ish olib bormoqda. Guruh a'zolari test sinovlariga kelgan abiturientlar va ularning ota-onalari bilan suhbatlar tashkil qilib, ijtimoiy so‘rovlar o‘tkazishmoqda. Shuningdek, ota-onalar uchun madaniy tadbirlar tashkil qilinib, kutish vaqtlarini mazmunli o‘tkazishga ko‘maklashmoqdalar.

G‘ayrat Otajonov, “Xalq so‘zi”.