Tilim “Man Siti” deb chiqqan… Oʻzbek millati shunday xalqki, oʻz farzandlari yutugʻidan zavq olishga, gʻururlanishga oʻrgangan. Deyarli transferi hal boʻlgan Abduqodir Husanov hamyurtlariga shunday tuygʻularni his qilishga imkon berdi. Eldor Shomurodov 2020-yilda Italiyaga yoʻl olgach “Tilim «Jenoa” deb chiqqan» degan iboralar paydo boʻlgandi. Ha, biz oʻz millatimiz bilan gʻururlanishni yoqtiramiz.

Mashhur aktyor Charli Chaplin oʻz yutuqlari haqida gapirar ekan shunday degan edi: “Har bir katta yutuq ortida, uni qoʻllab-quvvatlagan xalqning kuchli muhabbati bor”. Ha, sportchining yutuqlari ortida millatdoshlarining qoʻllab-quvvatlashi ham yotadi. Quyida Husanov qanday qilib katta futbol olamiga kirib keldi va Yevropaning eng kuchli jamoalari orasida talash boʻlgani haqida gaplashamiz.

Abduqodir Husanov – 20 yoshli markaziy himoyachi, Yevropa futbolida yangi yulduz sifatida tan olinayotgan futbolchilardan biri. Uning oʻziga xos oʻyin uslubi va jismoniy kuchli jihatlari tufayli Yevropaning eng kuchli klublari, jumladan, “Manchester Siti”, “Real Madrid” va “Chelsi” kabi jamoalarning diqqatini jalb qildi. Xususan, “Man Siti” uning tezlik, kuchli himoyachilik va yuqori darajadagi taktik aql-zakovatini inobatga olib oʻz saflariga qoʻshish istagini bildirgan.

Husanovning Yevropadagi muvaffaqiyati uning milliy jamoa bilan erishgan yutuqlari va “Lans” jamoasidagi faoliyati bilan bogʻliq. U 2023-yilda Oʻzbekiston U-20 jamoasi bilan Osiyo Kubogini qoʻlga kiritdi va jamoaning himoyadagi asosiy ustuni sifatida eʼtirof etildi. Shuningdek, Fransiyaning “Lans” klubida oʻzini koʻrsata olib, “Liga 1” va Chempionlar Ligasidagi oʻyinlari orqali yuqori saviyadagi jamoalarning radariga tushdi.

“Man Siti” uni oʻz himoya chizigʻini kuchaytirish uchun muhim transfer deb hisobladi. Ayniqsa, klub himoyachilarining yoshi kattaligi va jarohatlarga moyilligi tufayli Husanov kabi yosh va iqtidorli oʻyinchi ular uchun strategik ahamiyat kasb etmoqda. Uning Yevropaning yuqori darajadagi klublariga qiziqish uygʻotgani Oʻzbekiston futbolining xalqaro maydondagi yana bir yutugʻi sifatida qaralmoqda.

“Bunyodkor”ning asosiy tarkibiga “tortmagan” boʻlajak yulduz

Abduqodir Husanov futbolga oʻzining birinchi qadamlarini “Bunyodkor” akademiyasida qoʻygan. Uning futbolga boʻlgan qiziqishi va tashabbusida otasi Hikmat Hoshimovning rolini alohida taʼkidlash lozim. Hikmat Hoshimov oʻz vaqtida Oʻzbekiston terma jamoasi aʼzosi boʻlgan va futboldagi faoliyati tufayli oʻgʻli uchun haqiqiy ilhom manbai hisoblanadi. Abduqodirning bolalik orzusi ham aynan otasi kabi katta klublarda oʻynash va professional futbolchi boʻlish edi. “Ustozidan oʻtmagan shogird” boʻlishni istamagan Abduqodir nafaqat otasi, balki oʻzbek futbolida ham yangi sahifa ochdi.

“Bunyodkor” akademiyasidagi dastlabki faoliyati davomida Husanovning oʻyin uslubi va jismoniy koʻrsatkichlari murabbiylarning diqqatini tortgan boʻlsa-da, u klubning asosiy jamoasiga qoʻshila olmadi. Sabablardan biri sifatida uning yoshligida jismoniy tomondan zaif va qattiq raqobatga tayyor emasligi koʻrsatilgan. Bu holat uning katta orzularidan birini, yaʼni otasi oʻynagan klubning asosiy tarkibida boʻlish orzusini amalga oshirishga imkon bermadi. Ha, professional faoliyatida Husanov birorta oʻzbek klubida toʻp surmagan.

Husanov qiyinchiliklarga qaramay, oʻz orzusidan voz kechmadi. 2022-yilda u 18 yoshida Belorussiyaning “Energetik-BGU” klubiga qoʻshildi. Bu klubda u tezda oʻzini koʻrsata boshladi va asosiy tarkibda doimiy oʻyinchiga aylandi. Minsk jamoasidagi faoliyati Husanovning professional darajadagi jismoniy kuchini oshirish va tajriba orttirishi uchun muhim bosqich boʻldi. U jamoaning asosiy himoyachi sifatida mustahkam oʻyin koʻrsatib, klubning milliy chempionatdagi oʻrnini yaxshilashga hissa qoʻshdi.

Zar qadrini zargar bilar…

“Energetik-BGU” jamoasidagi oʻyinlari davomida Husanov koʻplab murabbiylar va skautlarning diqqat markaziga tushdi. Uning Belorussiyadagi muvaffaqiyati uning keyingi xalqaro yutuqlari uchun asos boʻldi. Ayniqsa, Husanovning himoyadagi ishonchli harakatlari va jamoaviy oʻyinga qoʻshgan hissasi uning Yevropadagi keyingi manzili boʻlgan “Lans” klubiga oʻtishini taʼminladi.

Husanovning futboldagi dastlabki bosqichlari, har qanday qiyinchilikka qaramasdan, oʻzini koʻrsatish va muvaffaqiyat qozonish yoʻlida qanday sabr-toqatli boʻlganini namoyon qiladi. Uning Belorussiyadagi faoliyati uning kelajakdagi ulkan yutuqlari uchun poydevor boʻlgani aniq.

2023-yil Abduqodir Husanov uchun xalqaro maydonda ulkan yutuqlar davri boʻldi. Oʻzbekiston U-20 terma jamoasi bilan u oʻz uy maydonida oʻtkazilgan U-20 Osiyo Kubogini qoʻlga kiritdi. Himoyadagi ajoyib oʻyinlari tufayli jamoa butun turnir davomida faqat bitta gol oʻtkazib yuborgan, bu esa Husanovning himoyadagi ishonchli harakatlari bilan bevosita bogʻliq.

Mazkur yutuqlar ortidan Xusanov “CIES Football Observatory” tomonidan dunyodagi eng istiqbolli himoyachilardan biri sifatida eʼtirof etildi. Uning yuqori darajadagi jismoniy tayyorgarligi, kuchli taktik fikrlash qobiliyati va himoyadagi qatʼiy harakatlari koʻplab xalqaro ekspertlar tomonidan tan olindi. Bu unga nafaqat Oʻzbekiston, balki jahon futbolida ham diqqat markaziga tushishga yordam berdi.

Milliy jamoaning Husanov siymosiga taʼsiri

U-20 Osiyo Kubogidagi muvaffaqiyatidan soʻng, Husanov 2023-yilda Argentinada oʻtkazilgan U-20 Jahon Chempionatida Oʻzbekiston terma jamoasi tarkibida toʻliq oʻynadi. U har bir oʻyinda yuqori saviyadagi harakatlarini namoyish etdi va jamoa musobaqaning 1/8 finaliga qadar yetib bordi. Xususan, Isroilga qarshi oʻtkazilgan bahsdagi oxirgi daqiqada kelgan magʻlubiyat jamoa uchun qiyin boʻlgan boʻlsa-da, Xusanovning oʻyini keng eʼtirofga sazovor boʻldi.

Mazkur musobaqalardagi muvaffaqiyatlari uning xalqaro futbolidagi oʻrnini yanada mustahkamladi. Uning nafaqat himoyada, balki jamoaviy oʻyin tashkil qilishdagi roli uni kelajakda Yevropaning eng yirik klublari uchun istiqbolli oʻyinchiga aylantirdi. Xusanovning yutuqlari Oʻzbekiston futbolining xalqaro maydondagi obroʻsini oshirishda muhim ahamiyat kasb etdi.

Ertakning boshlanishi

2023-yilning yozida Abduqodir Husanovning Yevropadagi karyerasi yangi bosqichga koʻtarildi. U Fransiyaning mashhur “Lans” klubiga atigi €100,000 evaziga sotib olindi. Bu transfer uning Yevropada oʻzini namoyon etishi uchun muhim qadam boʻldi, chunki Xusanov kam mablagʻ evaziga xarid qilingan boʻlsa-da, uning iqtidori juda katta boʻlgani tez orada oʻz isbotini topdi.

“Lans” klubiga qoʻshilganidan soʻng, Xusanov Fransiyaning “Liga 1” musobaqasida oʻzining birinchi mavsumini oʻtkazdi. U jamoa tarkibida 11 ta oʻyinda maydonga tushdi, shuningdek, Chempionlar Ligasida ikki bor zaxiradan maydonga tushib, oʻzini yuqori saviyada koʻrsatdi. Bu oʻyinlar orqali u nafaqat klub muxlislari, balki xalqaro skautlar va ekspertlarning ham eʼtiborini qozondi.

2023-yilning oʻrtasida jamoaning asosiy himoyachilaridan biri, Kevin Danso, Rimning “Roma” klubiga transfer qilinishi arafasida himoya chizigʻidan chiqib ketdi. Husanov uchun bu muhim imkoniyat boʻldi. Dansoning yurak kasalligi sabab tibbiy koʻrikdan oʻtolmasligi natijasida uning transferi amalga oshmadi, biroq u vaqtda Xusanov jamoaning asosiy tarkibida oʻz oʻrnini mustahkamlashga ulgurgan edi.

Xusanovning oʻyinlari oʻsha vaqtda “Lans” jamoasidagi himoya markazini qayta shakllantirdi. Kevin Danso va Husanov jamoaning himoya chizigʻida muhim juftlikka aylanishdi, ularning hamkorligi jamoaning mustahkam himoya koʻrsatishida hal qiluvchi rol oʻynadi. “Liga 1”da “Lans” jamoasi barcha oʻyinlar boʻyicha atigi 15 ta gol oʻtkazgan holda, Fransiyaning eng yaxshi himoya koʻrsatkichlaridan birini qayd etdi.

Nega aynan Abduqodir?

Uning Yevropadagi rivojlanishi oʻzining jismoniy kuchli harakatlari, aqlli taktik fikrlash qobiliyati va raqib hujumlarini zararsizlantirish mahorati bilan aloqador. Husanov Fransiyada oʻz oʻrnini topibgina qolmay, kelajakda Yevropaning eng yuqori saviyadagi klublari uchun ideal himoyachi boʻlish imkoniyatini koʻrsatdi. Uning Fransiyadagi ilk mavsumi uning iqtidorini yanada ochib bergan muhim bosqich boʻldi.

Abduqodir Husanovning kuchli jihatlari jismoniy kuch, hayratlanarli tezlik va taktik intellekt bilan yaqqol ajralib turadi. U jamoada nafaqat himoya chizigʻini mustahkamlaydi, balki oʻyinlarning ritmini tushunish va hujumlarni tashkil qilishda ham katta rol oʻynaydi.

Husanovning raqib hujumchilarini tezkorlik bilan quvib yetib, ularning harakatlarini zararsizlantirish qobiliyati muxlislar va murabbiylar tomonidan yuqori baholangan. Masalan, 2023-yil oxirida uning 37 km/soat tezlikda raqib hujumchisini quvib yetishi aks etgan videolavha internetda viral boʻldi. Bundan tashqari, uning jismoniy kuchi “poyezd bilan toʻqnashish”ga tenglashtiriladi. Ha, bu oʻxshatish nafaqat oʻzbek segmentida xalqaro nashrlarda ham oʻz aksini topib kelmoqda.

“Liga 1” va “Lans”ning ham Husanov siymosini ravnaq toptirishdagi hissasi

Yevropaning turli klublari Husanovga katta qiziqish bildirdi. Yozdagi transferlar oynasida Husanov “ertagi” qishgisidagiday emas edi, ammo bu mavsumdagi ajoyib oʻyinlari uni tanitdi. “Real Madrid”, “Chelsi”, “Tottenxem” va “Nyukasl” kabi klublar ham uni kuzatib kelayotgani haqida mishmishlar tarqaldi. Italiyalik insayder Fabritsio Romano esa deyarli har soatda u haqida yangilik borligi haqida yangidan yangi maʼlumotlarni tarqatdi. Dastlab, “Lans” uning transferi uchun €20 million miqdorida summa soʻragan boʻlsa, “sovchilar” koʻpaygach narx 50 milliongacha oshib ketdi. Osiyolik futbolchilarning bunchalik koʻp “gap-soʻz” boʻlmagan edi.

“Liga 1” va “Lans”ning ham Husanov siymosini ravnaq toptirishdagi hissasini alohida taʼkidlash kerak. Xususan, fransiyalik muxlislarning mehri oshishi uni “Man Siti”dek taniqli jamoaga oʻtishiga sabab boʻldi. “Lans” darvozaboni Briz Samba Abduqodirni “hayotimda koʻrgan eng qoʻrqinchli himoyachi” degan edi. Darvozabonlarning bunday eʼtirofi koʻp hollarda katta narsalarni anglatadi. Bu yuksak ishonch edi. Husanov ham oʻz navbatida mehnatsevarligi bilan Yevropadagi eng nufuzli klublarda oʻynashga munosib ekanligini isbotlamoqda.

Husanov “Manchester Siti”ga nima bera oladi?

“Manchester Siti”ning himoya chizigʻidagi muammolar Abduqodir Husanovning bu klubga oʻtish imkoniyatini yanada oshirdi. Jamoa himoyachilarining jarohatlarga moyilligi, jumladan, Jon Stouns, Ruben Diash va Natan Ake kabi asosiy himoyachilarning mavsum davomida koʻplab oʻyinlarni oʻtkazib yuborishi Pep Gvardiolani qiyin ahvolga solib kelmoqda. Bundan tashqari, jamoaning himoya chizigʻidagi oʻyinchilarining yoshi kattalashib bormoqda: mavsum oxiriga qadar Kayl Uoker, Stouns, Akanji va Ake 30 yoshdan oshadi. Bu kabi holatlar klubni yosh va iqtidorli himoyachilarga ehtiyoj sezishga olib keldi.

Husanov “Man Siti”da ushbu muammolarni bartaraf etishda katta rol oʻynashi mumkin. Uning jismoniy kuchli boʻlishi, tezkorlik va himoyadagi qatʼiy harakatlari jamoaning mustahkam himoya chizigʻini shakllantirishda yordam berishi mumkin. Uning yuqori tezlikdagi harakatlari va taktik intellekt bilan hujumlarni zararsizlantirishi, shuningdek, havodagi duellardagi ustunligi uning Ruben Diash kabi oʻyinchilar bilan taqqoslanishiga sabab boʻlgan. Ushbu jihatlar “Man Siti”da oʻyin uslubiga mos tushishi va jamoaning kuchli himoya tizimini qayta tiklashda yordam berishi mumkin.

Bitta “lekini” ham bor...

Xalqaro ekspertlarga koʻra, Husanovning “Man Siti”da muvaffaqiyat qozonishi uchun kamchiliklarini bartaraf etishi zarur. Uning uzatmalar aniqligi past darajada va qarorlar qabul qilishdagi kamchiliklari yuqori darajadagi jamoalarga moslashishda qiyinchilik tugʻdirishi mumkin. Pep Gvardiolaning oʻyin uslubi nafaqat himoyada, balki hujum tashkil etishda ham yuqori darajadagi koʻnikmalarni talab qiladi. Husanov ushbu talablarga moslashish uchun oʻz ishlash koʻrsatkichini yanada oshirishi lozim. Shuningdek, Holand, Foden va Savio kabi hujumchilar bilan ishlashi uning darajasini oshishiga yordam beradi.

Yevropaning yirik klublaridan biriga oʻtish Husanov uchun futboldagi yangi va yuqori bosqichni anglatadi. Uning agenti Gʻayrat Xasbiullin taʼkidlaganidek, Husanov Yevropa klublarida oʻz oʻrnini topish va dunyo miqyosida oʻzini namoyon etishga munosib oʻyinchi. “Man Siti”ga oʻtish unga Chempionlar Ligasi va Angliya Premyerligasida eng yuqori saviyada oʻynash imkonini berib, uning iqtidorini yanada ochib beradi. Agar ushbu transfer amalga oshsa, Husanov nafaqat “Man Siti” uchun, balki Oʻzbekiston futboli uchun ham muhim tarixiy voqeaga aylanadi.

Shaxsiy muvaffaqiyatdan, millat muvaffaqiyatigacha

Abduqodir Husanovning Yevropa futbol klublaridagi muvaffaqiyati nafaqat uning shaxsiy yutugʻi, balki Oʻzbekiston futboli uchun ham katta ahamiyatga ega. Uning Yevropaning eng nufuzli klublari diqqat markazida boʻlishi Oʻzbekiston futbolining xalqaro maydondagi obroʻsini mustahkamlashda muhim qadam boʻladi. Husanov kabi futbolchilarning yuqori darajadagi liga va jamoalarda oʻynashi mamlakatning umumiy futbol darajasi va istiqbolini namoyon qiladi.

Husanovning Yevropadagi muvaffaqiyati xalqaro darajada Oʻzbekiston futbolini yanada tanitishga yordam beradi. Agar u “Man Siti” yoki boshqa yirik klublarga qoʻshilsa, uning maydondagi harakatlari va natijalari xalqaro futbolida Oʻzbekistonga boʻlgan qiziqishni kuchaytirishi mumkin. Bu nafaqat milliy terma jamoa uchun, balki oʻzbek futbolida yetishib chiqayotgan boshqa iqtidorli yoshlar uchun yangi imkoniyatlarni ochadi.

Abduqodir Husanov yosh futbolchilar uchun haqiqiy ilhom manbai sifatida namoyon boʻladi. Uning karyerasidagi muvaffaqiyatlar, qiyinchiliklarni yengib oʻtish qobiliyati va ishtiyoqli mehnati yosh avlod uchun yorqin oʻrnak boʻlib xizmat qiladi. Yosh futbolchilar uning misolida xalqaro maydonda oʻzlarini koʻrsatish uchun intilishga ragʻbatlanadilar. Shuningdek, u yoshlarga oʻz orzularini amalga oshirish uchun intizomli mehnat va barqaror ishlash qanchalik muhimligini koʻrsatadi. Ha, biz uning Manchester jamoasiga borishi fonida “Tilim «Man Siti” deb chiqqan», “bolaligimdan "Siti”ning muhlisi edim» kabi “qanotli iboralar”ning koʻpayishi turgan gap.

Husanovning muvaffaqiyati futbol infratuzilmasini rivojlantirish va yosh iqtidorlarni qoʻllab-quvvatlash boʻyicha mamlakatdagi saʼy-harakatlarga katta turtki boʻlishi kerak. Uni xalqaro klublardan birida koʻrish, oʻzbek klublari va terma jamoani boshqa xorijiy skautlar va klublar uchun qiziqarli qiladi. Bu esa Oʻzbekistondan yanada koʻproq iqtidorli futbolchilarning Yevropa va dunyo arenalariga chiqishiga sharoit yaratishi mumkin. Bu uchun esa haqiqiy isteʼdodlarning yoʻlini toʻsmaslik, kelajakdan umid qilishga sabab boʻlishi kerak.

Abduqodir Husanovning Yevropa futbolidagi rivojlanishi uning iqtidoriga boʻlgan ishonchning amaliy natijasidir. Abduqodirning Fransiyaning “Lans” klubidagi oʻyinlari va xalqaro musobaqalardagi faoliyati uni Yevropaning eng nufuzli jamoalaridan biri boʻlgan “Manchester Siti”ga transfer qilinishiga yaqinlashtirmoqda.

Oʻxshash baxtlar…

Lev Tolstoy “Anna Karenina” asarida “Barcha baxtli oilalar bir-biriga oʻxshaydi” degan edi. Bugun oʻzbek futbol muhlislarining his qilayotgan baxti juda oʻxshash. Abduqodirning shu joyga yetib kelishining oʻziyoq oʻzbek ota-onalarini farzandlarini sportga jalb qilishiga, kelajakka umid qilishiga sabab boʻladi. Millatga ham doim muvaffaqiyatli insonlar kerak.

Abduqodirga uzoq va muvaffaqiyatli faoliyat tilaymiz. Unga “yulduzlik kasali”ga chalinmaslikni va oʻz ustida ishlashdan charchamaslikni tilaymiz. Olgʻa, Abduqodir, olgʻa Oʻzbekiston!

Sanjar Shomurodov tayyorladi,

“Xalq soʻzi”.