Foto: “Oʻzenergoinspeksiya”

Fargʻona va Toshkent viloyatlarida tabiiy gazdan noqonuniy foydalanish holatlari fosh etildi. Bu haqda “Oʻzenergoinspeksiya” matbuot xizmati xabar berdi.

Maʼlum qilinishicha, inspeksiyaning Fargʻona viloyat hududiy boshqarmasi va gaz taʼminoti korxonasi hamkorligida nazorat tadbiri oʻtkazilgan. Unda Fargʻona shahrida joylashgan “D.B.” nodavlat MTMda hisoblagichdan tashqari tarmoqqa ulanib, tabiiy gazdan noqonuniy foydalanilgani aniqlangan.

Dastlabki hisob-kitoblarga koʻra, ushbu qoidabuzarlik natijasida, gaz taʼminoti korxonasining 160 million soʻmlik zarar yetkazilgan.

Yuqoridagi kabi holat Toshkent viloyati Ohangaron tumanida oʻtkazilgan tadbir davomida ham qayd etilgan. Maʼlum boʻlishicha, Ohangaron tumanida joylashgan “E.M.” MCHJga qarashli asfalt ishlab chiqarish zavodida 187 million soʻmlik tabiiy gazdan noqonuniy foydalanilgan.

Hozirda mazkur holatlar yuzasidan huquqni muhofaza qilish organlari tomonidan tergovga qadar tekshiruv ishlari olib borilmoqda.

Eslatib oʻtamiz, avvalroq Andijon shahrida 1 mlrd soʻmlik tabiiy gazdan noqonuniy foydalanish holati aniqlangani haqida xabar berilgan edi.